Ministru Finansa, Rui Gomes hatete, dadauk sira hahú verifika hela lista liña frente sira husi PNTL, F-FDTL inklui Sentru Intergradu Jestaun ba Krize (SIJK), tanba ne'e balun laiha problema bele hala'o ona pagamentu.
"Kona-bá liña frente, ami semana-rua liubá, ami simu ona lista husi PNTL, F-FDTL, sala de situasaun, mígrasaun ne'ebé dadaun ami halo hela verifikasaun, e balun ke laiha problema ne'e semana oin bele selu ona, e sira seluk sei verifika”, dehan nia iha Parlamentu Nasionál (PN), sesta (15/10).
Pozisaun Ministeriu Finansa mantein halo verifikasaun tanba orsamentu ba frontline ne'e mai husi osan Estadu.
"Ita-boot sira hatene, katak pagamentu ida ne'e ho osan estadu, no labele lekar osan Estadu nian arbiru. Ema ne'ebé la servisu iha liña frente nia la merese atu simu”, dehan nia.
Ba lista sira ne'e, barak mai husi ema sira ne'ebé tur de'it kantor maibé hakarak simu hotu, tanba ne’e Governu presiza verifika, no la'ós ko'alia ema atus de'it, maibé ne'e ko'alia ema-rihun nian.
"E lista sira ne'e mahar teb-tebes ne'ebé verifikasaun halo dadaun, e diretu ne'e lalakon e ami sei halo pagamentu”, afirma nia. (*)