Xefe Suku Ailelo, Geraldo Martins hatete, iha tinan 2015 Governu Timor-Leste fó fiar ba Kompaña Upai unipesoal, Lda atu instala liña eletrisidade ba populasaun iha Suku Ailelo maibé tanba Governu la selu ba Kompaña to'o ikus populasaun sira kontinua tur nafatin iha nakukun laran.
"Ami-nia área ne'e loloos ne'e listrik tama tiha ona, besi rin dada kompletu tiha ona, ha'u ko'alia ho kompaña husu dehan, tanba saida mak ahi la lakan tan?. Kompaña dehan fali, tanba Estadu mak sei deve hela ami-nia osan, tanba ami halo servisu ne'e lori ami-nia osan mak halo maibé to'o ikus Estadu la fó ami-nia osan”, dehan Geraldo ba www.tempotimor.com iha Aldeia Betupu, sesta (15/10).
Maske líder Komunitáriu esforsu hela atu bele asesu liña eletrisidade maibé seidauk iha rezultadu ne’ebé pozitivu.
"Direta, indireta mós ha'u hato'o tiha hotu ona ba EDTL, foin dadauk ne'e sua Eselénsia Primeiru Ministru (PM) ha'u hato'o kedas”, afirma nia.
Liña eletrisidade ne'ebé kompaña Upai unipessoal,Lda instala ba populasaun iha suku Ailelo hahú iha tinan 2015 to'o agora ahi seidauk lakan.
“Iha ne'e la'ós veteranu sira mak impede, se ita ko'alia veteranu ha'u mós ema veteranu ida, maibé ha'u hanoin mak ha'u-nia populasaun tur iha naroman, ha’u lakohi atu tur iha nakukun”, dehan nia. (*)
