“To'os nain husi Bulmers Farms, Austrália mak mai atu rekruta tan ita-nia Timoroan ba SWP nain 20 no mós ba Kompañia Pacific Leveraging nain 10, sira ne'ebé ba tiha ona fulan neen mak atu rekruta tan ba tinan tolu iha Austrália,” hatete SEFOPE ba Tempotimor.com, bainhira remata enkontru ho ajénsia Bulmers Farms iha edifisiu SEFOPE, Kaikoli, Díli, Kuarta (28/08/19).
SEFOPE dehan, kompañia ne'e hahú rekrutamentu ohin (Kuarta) to'o Sesta. Iha sorumutu ne'e, SEFOPE sita mós kona-ba akordu ne'ebé SEFOPE asina ho Governu Austrália kona-ba mekanismu transfere traballadór sira-nia salariu liuhosi Banku Nasionál Komérsiu Timor-Leste (BNCTL).
“Tanba ita asina ona akordu. Nune’e, sira bele mai foti osan iha Timor. Tanba ida ne'e mak prioridade. Ita hakarak osan ne'e mai iha Timor no nia simu mós iha Timor, hodi bele ajuda fali nia familia uma laran. Kuandu laiha, ita labele halo buat ida. Tan ne'e, ha'u husu mós to'os nain sira nian kontribuisaun. Se lae, ita labele halo buat Ida,” Julião afirma.
SEFOPE hatete, kompañia ne'e halo rekrutamentu ba dala rua ona. Uluk, tuir SEFOPE, rekruta ona nain 20. Agora, sira hakarak rekruta tan e programa rua ne'e dala ida. Ida mak SWP ho Pacific Leveraging.
“Maibé, kompañia ne'e hakarak sira ne'ebé mak ba ona servisu fulan neen, mak kompañia hakarak uza fali. Tanba, sira iha ona esperensia, koñesimentu no hatene uitoan kona-ba servisu iha ne'ebá. Atetude oinsá, sira hatene hotu ona. Entaun sira atu ba kompleta de'it,” SEFOPE informa.
Maski nune'e, SEFOPE dehan, parte kompañia obriga nafatin sira ne'ebé ba tiha ona durante fula neen ne'e atu tuir nafatin testu Inglés di'ak liután, ho razaun para bele aumenta sira-nia abilidade.
SEFOPE subliña, se kompañia rekruta ona, la hein to'o fulan, traballadór bele ba ona. Nia dehan, razaun tanba kompañia presiza ema atu servisu.
“Ita-nia problema mak ne'e, Governu tenke halo investimentu ba traballadóres sira. Ezemplu, tiket ba ne'e traballadór mak selu. Mai fali kompañia mak selu. Agora, karik tiket ne'e mak $1,000.00 entaun traballadór nian $500,00, Governu ajuda $500,00. Ba servisu tiha lai mak fó fali Governu nia osan $500,00. Maibé, traballadór nia salariu simu iha BNCTL,” SEFOPE fó ezemplu kona-ba oinsá Governu investe para bele ajuda traballadór sira.