Administradór Postu Administrativu Baguia, António Ramos hatete, komunidade kontinua preukupa, tanba dalan refere atu halo konstrusaun, maibé ikus mai governu altéra.
"Ami rona dehan apróva ona hein atu implementa de'it, maibé ikus mai ami rona dehan altéra filafali, ida ne'e mak preukupasaun ba komunidade baguia", dehan nia iha salaun sentru konvensaun (CCB), tersa (26/10).
Nia afirma, dalan refere, la'os halo ona konstrusaun mak a'at fali, maibé aat husi kedas tempu okupasaun idanezia nian to'o mai ohin loron.
Dalan ne’e, problema boot, tanba iha tempu bai-loron transporte sira sei bele asesu, maibé tempu udan difikulta tebes ba movimentasaun.
"Sente ne'e ukun-an duni, maibé ukun-an ne'e prense dezenvolvimentu iha laran, la'os ukun-an ko'alia de'it, estrada ne'e importante ba komunidade", informa nia.
Nune'e, komunidade kontinua husu ba Governu atu halo konstrusaun ba estrada diresaun laga ba baguia, atu povu agrikultór sira bele lori sai sira-nia produtu asesu ba merkadu iha Munisípiu no Kapítal nasaun. (*)