Sekrétariu jerál Konsellu Vetéranus Munisípiu Baukau, Manuel da Costa Soares hatete, halo tratamentu ba dezmobilizadu ho kuadru rejistensia kombatentes husi postu no suku iha Munisípiu Baukau, tanba durante problema saúde ba vetéranu seidauk iha solusaun.
Tanba, dala barak vetéranu sira hetan moras gráve lori ba Ospitál Nasionál Gidu Valadares (HNGV) la konsege halo tratamentu no kontinua transfere ba rai liur, maibé ikus mai nafatin la salva sira nia vida.
"Tanba ne'e, konsellu Munisípal Baukau buka tuir vetéranus sira atu rona sira nia ístoria moras atu espesialista ne'ebé mai tau iha klínika komesa ona atendementu ba sira buka solusaun ba moras ne'ebé sira infrenta", dehan nia iha klinika riamere, tersa (23/11).
Manuel mós agradese ba Ministéiru da Saúde (MS) ne'ebé oferese ona sentru saúde riamare no iha sala balun sai klinika espesial hodi halo tratamentu ba vetéranu sira.
Maibé, klínika riamare la'os fó atendementu ba vetéranu sira de'it, bele mós fó atendementu ba familía kbi'it la'ek ne'ebé presiza halo tratamentu saúde.
"La'os ba vetéranus de'it, maibé ami mós fó espasu ba kbi'it la'ek sira bele mós ba Vikeke, Manatutu, Baukau, Lospalos no mós ba timor laran tomak", nia akresenta
Nune'e, vetéranu dezmobilizadu 15/19, António Abelino da Costa Lopes sente kontente ho inisiativa konsellu vetéranus ne'ebé harii ona klinika ba vetéranu sira, tanba bele halo atendimentu lalais ba ema ne’ebé presiza hetan tratamentu.
"Primeira ves mak harii ida ne'e, tanba maluk barak mak mate, tanba atendementu la duun masimu ba vetéranu sira", katak António
Entertantu, Tekniku Fisioterapia Ospitál referal Eduardo Ximenes (HorEX-sigla Portugés), Irene Paula Fraga hatete, nafatin hamutuk ho médiku husi Postu Saúde Buakau atu responde ba programa ne'ebé Konsellu Munisipál Kombatente Libertasaun Nasionál Baukau prepara ona.
Tanba ne’e, asistensia sira ba hasoru Inan-aman no veteranu iha Postu Admistrativu Laga, Kelikai, Baguia, Venilale, Vemasse no Baukau vila atu hatene sira nia kondisaun.
“Difikuldade ne'ebé sira hasoru mak hanesan vizitante veteranu iha postu admistrativu sira, tuir informasaun iha postu admistrativu ida veteranu hamutuk pur-volta 300, maibé iha Kelikai hetan vizitante veteranu na'in-189, Laga na'in-56, Venilale na'in-68, Vemasse na'in-46, maibé husi kazu ne'e mós tuir idade nia problema”, nia informa
Nia dehan, kazu barak liu mak problema ruin no isin ne'ebé hetan torturasaun iha tempu seidauk ukun-aan hanesan tiru, baku no iha kazu balun mós konsege halo operasaun ki'ik husi doútor hodi hasai kilat musan.
"Alende ne'e, iha kondisaun fiziku ne'ebé agrava, tanba uluk baku ho kilat, iha ruin balun ne'ebé hetan sofre mall formasaun, ain, liman hetan baku, tiru nune'e formasaun ladun di'ak", nia haktuir
Nune’e, prinsipál husi Konsellu Vetéranus Munisípiu Baukau buka hodi fó salva guarda ba maluk vetéranu sira atu iha saúde di'ak ba espasu moris no sufisiente ba sira bele konta netik istória lós ba jerasaun foun sira. (*)
