Koordenadór Gabinete Apoiu Sosiedade Sivíl (GASC), Filipe da Costa hatete, iha tinan 2021 Governu oferese Orsamemtu Jerál Estadu (OJE) tinan 2021 hamutuk Miliaun US$7,3 maibé ba tinan 2022 tun ba Millaun US$4 de'it.

"Fundu iha Gabinete Apoiu Sosiedade Sivíl ne'e ne'e sempre tun sa'e depende ba orsamentu tinan ida ninian, iha 2019 ita iha purvolta de milliaun US$5, tinan 2020 aprova de'it milliaun US$3 no tinan 2021 ita iha Millaun US$7.3 depois iha 2022 prevé millaun US$4 ne'ebé depende”, dehan Filipe ba Jornalista iha Salaun Luz Clarita, sesta (26/11).

Nune'e Koordenadór ne'e apela ba Sosiedade Sivíl atu proativu liután no krítiku liu tan, atu inovativu liután iha kada Sosiedade Sivíl nia kna’ar fatin.

"Sosiedade Sivíl la'ós opozisaun maibé nia hala'o ninia papel hanesan ema ne'ebé fó hanoin atu dudu ninia opiniaun ba governu ida. Nune'e iha Programa Oitavu Givernu Konstitusionál ida ne'ebé mak apoiu Sosiedade Sivíl ida idak defende”, afirma nia.

GASC mós rekomenda atu sosiedade sivil reforsa liután Institusionál, Organizasaun Nau  Governamentál ida, tenke forte atu nune'e halo krítika ba instituisaun seluk bele iha kredibilidade.

Rekomedasaun seluk mak oinsá mak tenke hala'o nia papel ho di'ak atu labele falla iha implementasaun no Governu mós kontinua apoiu atividade ka movimentu sosiedade sivil nian iha baze. (*)