Tempotimor (Baukau)-Ministru Turizmu Komérsiu no Industria (MTKI), José Lucas Do Carmo Da Silva inaugura ona sentru turizmu komunitáriu Uai-Sakare ne’ebé lokaliza iha Suku Uailili, Postu Administrativu Baukau Vila, Munisípiu Baukau.

Nia dehan, turizmu ne'ebé hari’i husi komunidade Uailili ne’e, dezenvolve kapasidade foinsa'e sira nian iha baze no atu haforte potensia ekonomia.

"Konseitu turizmu ida ne'ebé ita halo mak hadi’a iha baze, ezemplu ita boot sira harii ona sentru komunitáriu liuhusi área turizmu nian ho partisipasaun ema hotu nian", dehan MTKI, sesta (26/11).

Tanba ne'e, hato'o agradese ba parte hotu nia kontribuisaun no dedikasaun ne’ebé konsege dezenvolve área turizmu komunitariu iha baze.

Nune'e, kordenadóra grupu servisu turizmu komunitária, Esperanca Sarmento, senti kontenti, tanba Governu liuhusi MTKI bele aprova proposta komunidade Uailili nian hodi konstrui picina to'o hetan inaugurasaun.

Dezenvolve fatin turizmu ne’e bele hasa'e rendimentu ekonomia lokál, promove valór kulturál no garante sustentabilidade ba dezenvolvimentu nasionál.

"Fó impaktu ekonomi no sosiál mai Munisípiu Baukau liu-liu suku Uailili", katak nia

Entertantu Xefe Suku Uailili, Hernanio de Jesus Araujo Ribeiro hatete, Uailili iha poténsia boot ba produtu lokál ho mós fatin turizmu.

Tanba ne'e, husu ba komunidade tempu to'o ona atu hadia aan no fó apoiu  ba grupu traballu ne’ebé estabelese ona iha Ualili hanesan fatin turismu komunitáriu.

"Tempu to'o ona ita atu hadia aan no halakon hahalok muturabu, maibé oinsa ita hotu hamutuk dezenvolve fatin turistiku ne'ebé dadaun ita inagura", dehan nia. (*)