Iha ámbitu enseramentu ne'e SEKoop Elizário Ferreira hato'o parabéns ba estrutura eleitu ne'ebé mak lidera Kooperativa sira iha Munisípiu Aileu hodi kontinua ba oin.
"Uluk nana’in ha'u hakarak hato'o parabéns ba estrutura eleitu, dirijente sira, membru sira, realiza filafali imi-nia Asembleia Jerál iha tinan ida ne'e, molok atu ensera ita-boot sira-nia atividade, dahuluk ha'u hakarak hatete, parabéns, e basaliman ba imi-nian an, tanba ne'e ba oin servisu nafatin e komunika malu nafatin, kona-ba imi-nia relatóriu atividade ne'e ba SEKoop inklui atividade”, dehan Elizário iha salaun Bombeiru iha Suku Malere, Munisípiu Aileu, sesta (03/12).
Nune'e Sekretária Estadu mós kontinua husu ba Kooperativa sira iha Munisípiu Aileu atu kontinua hato'o relatóriu mensál ba SEKoop iha nasionál.
"Servisu ba oin ita koopera nafatin komunika malu nafatin, e hato'o imi-nia relatóriu atividade ne'eba SEKoop nasionál inklui hato'o imi-nia profile ida ne'ebé ohin temi dehan ema rihun-rua maibé feto hira mane hira tenke kompletu”, esplika nia.
Nune'e Prezidente Kooperativa Komérsiu Agrikola de Timór, Domingo Noroña hatete, iha atividade prinsipál tolu mak realiza iha Assembleia Jerál kooperativa nian ba tinan 2021 iha Aileu.
"Assembleia Jerál ba tinan ida ne'e atividade prinsipál tolu (3) mak ami halo mak halo revizaun ba estatutu sira, ida ne'ebé di'ak ami kontinua aplika, atividade segundu mak regulamenntu internu, atu nune'e bele sai lei ida atu seguransa mós ba estatutu sira, terseiru mak polítika jéneru nian oinsá feto mós bele partisipa iha kooperativa sira”, dehan Domingos Noroña.
Kooperativa ne'ebé partisipa iha Assembleia Jerál hamutuk 16, mai husi Munisípiu hitu hanesan, Aileu, Ainaru, Covalima-Suai, Ermera, Manatuto, Manufahi, Likisá, dadaun ne'e membru hamutuk iha 2.076. (*)
