Tempotimor (Dili) – Bankada FRETILIN iha Parlamentu Nasionál (PN) husu ba bankada Governu atu labele 'show force' ba proposta lei atividade petrolífeiru no lei fundu petrolífeiru ne'ebé hetan veto husi Prezidente Repúblika. Tanba, tuir bankada oposizaun ne'e, buat ida mak inkonstituisionalidade kontinua inkonstituisionalidade.

"Se ita hakarak show of power ne'e ita la'o. Maibé, ita la muda buat ida. Ida inkonstituisionalidade kontinua inkonstituisionalidade. Tanba la tuir buat ne'ebé mak tribunál hatudu nia konsekuénsia mak diploma ne'e sei la hetan promulgasaun," deklara Prezidente Bankada FRETILIN, Aniceto Guterres Lopes iha plenária PN, Tersa (08/10/19).

FRETILIN husu ba bankada Governu, atu halo reformulasaun ba diploma rua ne'ebé hetan julga husi Tribunál Rekursu no inkonstituisionalidade.

"Husu ba bankada Governu, mai ita hamutuk halo reformulasaun ba diploma sira ne'e, hanesan obrigasaun konstituisionál atu kumpri Konstituisaun RDTL no desizaun tribunal, nu'udar desizaun aas liu iha estadu Timor-Leste," dehan Aniceto Guterres.

Hatán ba deklarasaun ne'e, Prezidente Bankada CNRT Duarte Nunes katak, bankada Governu iha ona kondisaun ba halo reformulasaun ba diploma lei atividade petrolífeiru no lei fundu petrolífeiru.

Iha fatin hanesan, Bankada Partidu Libertasauan Povu (PLP), Maria Angelina Sarmento katak PLP prontu halo apresiasaun ba artigu ne'ebé mak ein kestaun.

"PLP Laiha objetivu show force. Maibé, oinsá mak show force be with dezenvolvimentu ba povu ida ne'e, atu lori dezenvolvimentu ne'ebé di'ak no sustentavel," dehan Maria.

Tempotimor (Dili) – Deputadu opozisaun iha Parlamentu Nasionál husu ba Governu daualu ne’ebé lidera husi Primeiru Ministru Taur Matan Ruak, atu hatudu rezultadu serbisu loron 100.

Deputadu husi Bankada FRETILIN, Dario Madeira sisi promesa Governu bainhira simu pose katak sei halo esforsu hotu-hotu iha loron 100, hodi hatudu rezultadu ba povu Timor-Leste.

“Ha’u reprezenta (povu) iha Parlamentu Nasionál ida ne'e, hakarak atu ko'alia tanba tempu mós besik ona. Orsamentu ba tinan 2020 atu mai ona PN, atu tama ba diskusaun,” Dario deklara iha PN, Tersa (15/10/2019).

Hanesan deputadu ne’ebé durante ne’e tuun ba hala’o kontaktu eleitorál iha baze, Dario hatete, nia sempre simu pergunta barak kona-ba kestaun ne’e.

Tanba ne’e, nia dehan, nu’udar reprezentante povu, nia iha obrigasaun ida atu husu tutan ba Governu kona-ba promesa ne’ebé halo ona.

“Hahú formasaun Governu (VIII) Señor Ministru sempre koalia katak “ami sei halo esforsu hotu-hotu iha 100 dias ami sei hatudu rezultadu,” dehan Dario hodi repete promesa ne’ebé Governu fó.

Maibé, nia hatutan, ohin loron povu husu rezultadu serbisu loron 100 mak ne’ebé?.

“Halo favor hatudu ba votante sira par sira mós bele hatene ida ne'e,” dehan nia.

Deputadu ne’e dehan, promesa ba loron 100 ne’ebé Governu AMP fó to’o ohin loron prejudika nafatin povu, liuliu iha área  Saúde, Bee-moos, Agrikultura, no Infraestrutura.

“Área hirak ne’e iha baze sei nafatin sai problema,” dehan nia.

Tempotimor (Dili) – Tuir prezidente bankada CNRT Duarte Nunes iha uma fukun Parlamentu Nasionál (PN) katak, Tribunál Rekursu Vitória la fó multa ba Timor-Leste, tanba akordu halo iha TL, la'ós iha Austrália.

"La fó multa ida ano (jornalista), ida ne'e disputa ida ne'ebé sira hakarak tenke ba hatán iha Tribunál  Vitória, Austrália ne'ebá. Mais, kontratu ne'e halo iha Timor. Ha'u lahatene lei ne'e la'o nusa. Ne'ebé, ita boot (jornalista) sira husu lei na'in sira ne'e," tenik deputadu Duarte iha PN, Kinta (12/12/19).

Nia dehan, kazu ne'ebé Austrália hakarak ba hatán iha Tribunál Vitória ne'e, sira politiza tiha.

"Ida frontéira marítima de'it sei ba rezolve iha tribunal internasionál, ida ki'ik oan ida ne'e sira koko halo politiza, ba ha'u laiha. Ha'u hanoin laiha problema," dehan Nunes.

Lider bankada CNRT ne'e mós afirma, imposivél Austrália mai ukun iha TL.

"Situasaun ida ne'e, ba ha'u laiha problema. Tanba, tidak mungkin (imposivél) Australia atu mai manda iha ne'e. Ne'ebé, kona-ba multa ne'e tuir sira nia versaun. Maibé, tenke iha desizaun mak foin multa," nia afirma.

Deputadu ne'e akresenta, fó multa ba TL laiha dalan. tanba kontratu iha ne'e, Austrália mak fó fali desizaun ne'e ba ha'u laiha dalan. O mai halo kontratu iha ne'e, servisu iha ne'e, iha ne'e mak tesi, la'ós iha ne'ebá. Sei karik hotu-hotu konkorda lori ba Tribunál Internasionál ne'e oin seluk," nia dehan.

Tempotimor (Dili) – Bankada Congresu Nasionál Rekonstrusaun Timorense (CNRT) iha ona pontu ida atu haree kona-ba Orsamentu Jerál Estadu (OJE) tinan fiskál 2020 nian, razoabilidade ba povu no nasaun. Tanba ne'e, iha prosesu diskusaun no debate mak sei esplika.

"OJE tinan fiskál 2020 nian ne'ebé governu lori mai billaun $1.950 ne'e depende ba dinámika debate nian. Tanba, antes ne'e CNRT dehan atu redúz OJE 2020 husi billaun $1.950 ba billaun $1,3. Ida ne'e diskusaun liu ona. Maibé, ita haree oinsá mak orsamentu bele razoavél," dehan deputadu CNRT, Patrocino dos Reis iha Parlamentu Nasionál (PN), Sesta (29/11/19)

Deputadu ne'e afirma, orsamentu ne'ebé iha importante razoavél no liga ba kapasidade ezekusaun governu nian, liga interese povu nian no funsionamentu mákina do estadu. Tanba ne'e, tenke razoavél. Tanba ein prinsípiu orsamentu ne'e tenke di'ak ba estadu, nasaun no povu," subliña Patrocino.

Alende ne'e, jornalista sira konfirma deklarasaun CNRT nian kona-ba atu vota kontra OJE 2020 nian, maibé deputadu Patrocino dos Reis dehan katak, iha prosesu debate mak haree.

Tempotimor (Dili) – Vise Prezidente Bankada CNRT iha Parlamentu Nasionál (PN), Partrocino dos Reis klarifika katak planu remodelasaun nia fukun mak membru VIII Governu inkompletu.

"Konferénsia remodelasaun ne'e hanesan rezolusaun ida ne'ebé tau iha konferénsia AMP nian. Maibé, seidauk deskute kle'an," dehan Patrocino, Tersa (19/11/19) iha resintu PN.

Nia afirma, remodelasaun sei la haree ba tempu. Maibé, remodelasaun mós parte ida husi avaliasaun ba servisu membru Governu nian.

"Remodelasaun ne'e la depende ba tempu. Maibé, haree ba rezultadu servisu. Atinje ka lae, buat sira ne'ebé ita halo. Remodelasaun ne'e, parte ida husi avaliasaun ba servisu Governu nian," Patrocino afirma.

Remodelasaun, nia dehan, foka liu ba postura Governu ne'ebé to'o ohin loron sei nafatin mamuk. Ida ne'e, tuir Patrocino, sei implika maka'as ba iha ezekusaun orsamentu. Liu-liu metas ne'ebé Governu define tuir nia programa ne'ebé atu lori povu ba moris di'ak nian," Partrocino salienta.

Tempotimor (Dili) – Prezidente Bankada CNRT iha Parlamentu Nasionál (PN), Duarte Nunes deklara, laiha deadline ba governu, atu hatama filafali proposta OJE 2020 ba PN.

"To'o agora, governu halo ona reformulasaun ba OJE 2020 nian. Ami hein de'it, para haruka mai PN. Mais, to'o agora ami seidauk rona informasaun. Governu sei haree hamutuk ho ministru sira, tanba redúz orsamentu sira tenke hatene, depois ajusta programa," dehan Duarte iha PN, Kinta (12/12/19).

"Laiha deadline. Tanba sira (governu) tenke prepara halo didi'ak. Natón ne'e, haruka fila. Signifika bainhira haruka mai fali, sei la haruka fila tan. Tanba ne'e, mai di'ak para ita aprova, tanba povu sira hein hela," nia dehan.

Tuir deputadu ne'e, maski OJE 2020 tarde, governu sei uza orsamentu duadésimu atu finansia husi Janeiru to'o Fevereiru 2020.

"Ita nia osan sei to'o iha 31 Dezembru. Depois, iha Janeiru 2020 ita sei iha duadésimu to'o Fevereiru. Tanba ne'e, ha'u hanoin di'ak hela," nia tenik.

Maske PN la fó deadline ba VIII governu ne'ebé lidera husi PM Taur Matan Ruak, maibé governu rasik mak promete atu enkamiña hikas ba PN iha loron Sesta 13 Dezembru 2019.

"Ami haree bele hatama fali OJE 2020 nian iha loron 13 Dezembru semana oin," promesa PM iha meza PN hafoin foti desizaun hodi retira OJE tinan 2020 nian, iha sesaun debate nia laran, Tersa loron 03 Dezembru liubá.

Tempotimor (Dili) – Primeiru Ministru (PM) Taur Matan Ruak promete sei aprezenta filafali Orsamentu Jerál Estadu (OJE) 2020 ba Parlamentu Nasionál iha 13 Dezembru 2019. Promesa ne'e PM Taur hato'o ba jornalista hafoin PM deside retira OJE 2020, husi Parlamentu Nasionál, Tersa (13/12/19) lokraik.

"Ami haree, bele hatama fali OJE 2020 iha loron 13 Dezembru semana oin. Signifika, iha loron 23 Dezembru 2019 ita bele remata debate OJE tinan fiskál 2020 nian," dehan PM Taur Matan Ruak husi meza Parlamentu Nasionál (PN).

Nia parte, PM dehan, sei diskute durante loron 13 nia laran, depois OJE 2020 sei tama filafali iha 13 Dezembru, para debate no remata iha loron 23 Dezembru.

Bankada CNRT liuhosi deputada Carmelita Moniz propoin ba PM atu aprezenta hikas OJE 2020 iha Janeiru 2020. Maibé, PM mantein nafatin ho loron 13 Dezembru.

"Hakarak fó hanoin de'it ba Primeiru Ministru katak, OJE 2020 ne'e bele aprezenta fali iha Janeiru 2020. Tanba, ita sei iha orsamentu 2019 nian. Ne'ebé, sei to'o iha fulan Marsu," propoin deputada CNRT Carmelita Moniz.

Tempotimor (Dili) – Deputadu Bankada CNRT, Aderito Hugo husu ba Komando Polísia Nasionál Timor-Leste (PNTL) no Falintil Forsa Defeza Timor-Leste (F-FDTL), atu halo investigasaun klean ba oknum forsa sira ne'ebé utiliza sala arma, hodi tiru komunidade nia animál.

"Akontesimentu dala hira ona, hanesan iha Fatuberliu keixa mai to'o iha komisaun B kona-ba forsa sira ne'ebé dehan ba kasa rusa, maibé kasa filafali komunidade sira nia karau. Kazu ne'e akontese," dehan Aderito iha Parlamentu Nasionál, Tersa (29/10/19).

Ho razaun hirak ne'e, eis Prezidente Parlamentu Nasionál (PPN) ne'e husu ba komando PNTL no F-FDTL, para oinsá halo kontrolu ba armas iha PNTL no F-FDTL. Tanbá, tuir Aderito, sei perigu liu bainhira armas hirak ne'e, ema sivíl sira mak uza hodi tiru animál refere.

"Hau fiar katak Komando PNTL no F-FDTL iha ona regras. Tanba, ita hatene katak ema sivíl la kaer kilat, so militár no polísia. Entaun ita husu ba komandu institusaun rua ne'e atu investiga didi'ak situasaun ida ne'e. Oinsá iha kontrolu ba uza armas hirak ne'e," dehan Aderito.

Tempotimor (Dili) – Konsellu Diretiva-Aliansa Mudansa ba Progresu (KD-AMP), seidauk iha hanoin atu ba Eleisaun Antesipada (EA), bainhira polémika membru Governu na'in 9, seidauk rezolve.  

“Deklarasaun Primeiru Ministru Taur Matan Ruak kona-ba ida ne'e, dala ruma faze ida atu hatán de'it ba deklarasaun KHUNTO iha Parlamentu Nasionál. Tanba, AMP seidauk iha diskusaun, seidauk tuur hamutuk hodi hanoin problema to'o boot, hanesan Eleisaun Antesipada,” hatete Deputadu CNRT, Duarte Nunes iha Parlamentu Nasionál, Tersa (22/10/19).

Molok ne'e, remata hasoru malu ho Prezidente Repúblika iha Palásiu  Prezidensiál, Bairru-Pite, Dili, Tersa, PM Taur Matan Ruak ba jornalista katak, nia prontu atu ba Eleisaun Antesipada, bainhira polémika kona-ba membru Governu na'in 9 labele rezolve.

Duarte hatete, AMP seidauk iha hanoin to'o iha Eleisaun Antesipada. Maibé, nia dehan, AMP tenta atu rezolve polémika membru Governu na'in 9, ne'ebé la hetan pose husi Prezidente Repúblika.

"Ami AMP seidauk ko'alia, ami iha ona intensaun atu haree took problema ne'ebé sira ezije ne'e to'o iha ne'ebé. Karik, loron ida ami mós bele hola desizaun hamutuk. Karik iha intensaun hamutuk, para atu hato'o lista foun karik. Ami bele ko'alia para PM bele hato'o lista foun," dehan Duarte.

Nia dehan, AMP sei hola desizaun ba deklarasaun deputadu KHUNTO nian, ne'ebé provoka PM hasai deklarasaun kona-ba Eleisaun Antesipada.

"Tanba iha bankada, ida ne'ebé ami hakarak, ami bele hato'o. Ne'ebé, ami sei tenta ko'alia desizaun saida mak ami hola kona-ba deklarasaun deputada Olinda Guterres nian, depois PM hasai estatementu ida ne'e. Ne'ebé, ida ne'e sei parsiál husi AMP, seidauk anivél AMP," deputadu ne'e afirma.

Tempotimor (Dili) – Iha posibilidade, Partidu Congreso Nacional Reconstrução Timorense (CNRT), lori Prezidente Repúblika (PR), Francisco Guterres Lú Olo ba tribunál. Tanba, viola membru Governu indijitadu na'in sia (9), nia direitu umanus.

"Desizaun Prezidente Repúblika nian ne'e foti tuir kompeténsia. Mas, kompeténsia ida ne'ebé bele kontrária ho konstituisaun, tanba direitu umanus. Ne'e, ema nia direitu. Ha'u tau ita boot iha ne'ebá, dehan ha'u la gosta o, ha'u hasai tiha o, nusa!" dehan Prezidente Bankada CNRT, Duarte Nunes ba tempotimor.com iha Parlamentu Nasionál (PN), Sesta (25/10/19).

Nia esplika, nu'udar nasaun ida, Timor-Leste mós iha tribunál. “Kuandu ema ne'e ita la satisfeitu, tanba direitu internasionál mós proteje ita, ne'ebé bele (ba tribunál)," dehan Duarte.

Duarte afirma, bainhira atu lori ba tribunál, presiza rona mós husi membru Governu indijitadu sira ne'ebé Prezidente Repúblika la fó pose. Nia dehan, tanba ema sira ne'e mak iha direitu.

Page 1 of 2

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com