Nia esplika, atividade sensibilizasaun ne'e, tanba inisiativa husi komunidade sira rasik ne'ebé husu ba SEKoop atu esplika kona-ba lala'ok kooperativa nian, nune'e komunidade hotu bele hahú hari'i rasik kooperativa.

"Atu haree ba poténsia área ida-ne'e nian iha suku tolu maka akomoda iha-ne'e, ba sira-nia poténsia suku ne'e maka, potente tebes ho Lagoa ida ne'ebé sai hanesan fatin ba kooperativa peska, fatin ba kooperativa turizmu, ba green house, ortikultura. Nne'e hotu integradu atu oinsá mak bele dezenvolve atividade kooperativa nian hodi fó benefísiu ekonómiku ba ita-nia populasaun sira iha área ida-ne'e nian", dehan SEKoop, Elizário Ferreira ba jornalísta sira iha Salaun Kapelaun, Suku Goulolo, Postu Administrativu Letefoho, Munisípiu Ermera, sesta (26/02).

Nia husu ba komunidade sira iha suku tolu hanesan, Goulolo, Eraulu no Humboe ne'ebé hakarak atu harii kooperativa, parte SEKoop sempre prontu atu apoia liuhusi organiza, forma, eduka, no oinsá atu estabelese kooperativa hodi fó vida ba ekonómia nian ba família.

"Liuliu suku tolu ne'ebé besik malu, suku Humboe, Eraulu, ho Goulolo ne'ebé bele asesu mós ba lagoa Eraulu ne'e, atu nune'e bele fó benefísiu ekonómiku ba populasaun sira iha área ida-ne'e," tenik nia.

Reprezentante Administradór Postu Administrativu Letefoho, Adolfo Soares, agradese ba Sekretáriu Estadu Kooperativa (SEKoop), Elizário Ferreira, tanba ho komitiva bele to'o ba vizita postu Letefoho, iha Suku Goulolo, hodi enkoraja no fó motivasaun ba populasaun sira oinsá bele hari'i kooperativa iha suku laran.

"Ami agradese teb-tebes, ne'ebé ami fó obrigadu ba sekretáriu estadu, bele mai direita hodi rona aspirasaun ami nia povu nian, nune'e hato'o ba nasionál hodi aumenta ita-boot nia programa hodi hala'o ba futuru", dehan nia.

Nia haktuir, Letefoho kompostu husi iha suku 8, aldeia 67 ho populasaun iua 28,225, no maioria populasaun moris ho vida agrikultór hanesan kuda kafé, ai-farina, fehuk, talas maibé la lori ba merkadu, tanba uza ba de'it ba konsumu.(*)