Tanba, bainhira konsidera dezáfiu hanesan obstakulu maka, susar tebes atu dezenvolve kooperativa ba futuru.
Kooperativa ninia prinsípiu ida maka atu halo interkooperasaun, hodi naklole-aan ba grupu kreativu sé de’it mak iha inisiativa atu harii kooperativa, husu atu hakbesik ba SEKoop.
SEKoop, Elizário Ferreira hato'o lia hirak ne'e, iha Salaun Parokiál Postu-administrativu Ermera Vila, Munisípiu Ermera, bainhira sai oradór ba semináriu ne'ebé organiza husi Alumni Parlamentu Foinsa’e Timor-Leste (APFTL) ho tema “Expozisaun Juvenil iha setór produtivu” iha loron kinta, (04/03).
“Iha kooperativa, dezáfiu ne'e hanesan oportunidade. Ha'u repete fila-fali, joven sira tenke aproveira katak, dezáfiu ne'e hanesan oportunidade. Dezáfiu labele sai obstakulu,” dehan nia
Nia hatutan, kooperativa iha ligasaun ho karáter transversál, ne'ebé involve husi ministériu, no entidade relevante sira hotu hodi hola parte iha vida kooperativa nian.
Durante observasaun ba juventude sira-nia atividade hotu, nota iha pekupasaun balun ne'ebé sidauk atinji maka, produtu seidauk iha kualidade, kuantidade produsaun sei menus, no grupu balu laiha sustentabilidade, tanba balu atividade paradu.
“Sé imi joven sira iha ona sustentabilidade ida-ne'e, ko’alia kona-ba iha imi-nia grupu sira, ha'u-nia parabéns ba imi,” hatete nia
Nia haktuir, durante ne'e iha grupu balu mak konsege nakfilak ona ba kooperativa, tanba sira hetan apoiu formasaun kona-ba akontabilidade husi SEKoop.
Nia afirma, durante nee mós dezáfiu ida ba joven sira la konsege halo atu ema seluk hatene sira-nia atividade maka la halo promosaun ba aan rasik.
“Sé imi halo promosaun karik, ema barak hatene ona imi. Entaun, tenki halo promosaun maka'as no halo inter-kooperasaun entre grupu sira. Ema enjeñeria bele hamutuk harii kooperativa enjeñeria. Ema pekuária bele hamutuk hari'i kooperativa pekuária, agro-pekuária, agro-agrikultura, kooperativizmu,” nia fó hanoin
Nune'e mós, Koordenadór Grupu Kreativa Tokoluli Arte Natureza (TAN), Silvestre Martins Soares, haktuir, grupu refere harii iha tinan 2019, hodi organiza joven sira iha suku laran halo fatin ka Spot foto ba vizitante sira iha Suku Tokoluli, Postu administrativu Ermera Villa, munisípiu Ermera.
“Durante ezisténsia ne'e, iha-ne'ebá ami halo fatin spot foto ne'e iha Kaebauk ho manu liras, depois kada spot ba turista lokál sira, selu ho dollar ida, ba internasionál sira tenke selu dolar lima,” nia informa. (*)
