Liga ba kondisaun infraestrutura no fasilidade sira ne'ebé kontinua sainpreokupasaun ba eskola sira iha área rurál sira, maka Diretór Eskola Sekundária Jerál Hélio Sanches Pina "Mau-Kruma" Eduadro Martins katak, eskola refere durante ne'e difikulta tebes ba fasilidade eskola nian.
"Dezafiu ne'ebé durante ne'e ami mak hanesan menus livru, kadeira, meza no komputador aat hotu, nune'e impede prosesu sira la'o ladun di'ak. Kona-ba kadeira ho meza menus liu, nune'e bainhira estudante tuir aprendizajen, na'in rua tenke tuur iha kadeira ida, depois presiza dukumentu ka materia ruma urjente ami manorin sira tenki haruka ba rental hodi imprime, nune'e bele fasilita estudante sira," dehan Eduardo ba www.tempotimor.com iha nia knaar fatin, Kuarta (17/3).
Haree ba fasilidadr ne'ebé limitadu tebes ne'e mosu mós situasaun krize ida hanesan Covid-19, maibé eskola refere kontinua prosesu aprendisajem, maibé nafatin ho regra ba ijiene pesoál nian.
Diretór eskola ne'e husu ba governu nafatin tau atensaun, liu-liu mobiliáriu iha eskola, kadeira, meza, livru no kumputadór.
"Kona-ba livru, ami halo ona proposta ba edukasaun munisípiu maibé to'o agora sedauk hetan resposta," dehan nia.
Entretantu Eskola Sekundária Jerál Hélio Sanches Pina "Mau-Kruma" lokaliza iha suku Poetete, postu administrativu Ermera vila, munisípiu Ermera. Ne'ebé ho totál estudante hamutuk 746 no manorin sira hamutuk 44 ne'ebé kompostu husi profesór permanente na'in 4, kontratadu na'in 30 no voluntáriu na'in 8.(*)