Husi inundasaun ne’e afeta mós ba estrada públiku ne’ebé lokaliza iha aldeia Gomhei suku Riheu postu administrativu Gleno, munisípiu Ermera nakonu ho rai no fatuk hodi difikulta ba transporte públika no privadu hoi labele halo movimentu.

Tuir motorista Domingos dos Santos katak, estrada refere aat kuaze semana ida ona, maibé parte relevante sedauk foti asaun ruma hodi hadi’a.

"Husu ba governu liliu Ministériu Obras Públiku (MOP) munisípiu Ermera nian no entidade hotu tenke hadi’a urjente ba dalan ne'e, tanba ami nu’udar kondutór ami nia servisu kada loron tenki tula pasajeru sira ba mai hodi bele hetan osan atu sustenta familia uma laran, se dalan aat hanesan ne'e, ami labele hetan osan tanba ne'e husu ba governu atu tau atensaun urjente,” dehan Domingos ba www.tempotimor.com iha fatin akontesementu, Sesta (9/4).

Hatán ba kestaun ne'e, diretór Obras públika no transporte munisípiu Ermera Armindo Soares rekoñese katak estrada refere aat semana ida ona, tanba kauza husi udan boot iha semana kotuk, maibé laiha orsamentu hodi hadi’a.

Maske nune’e, MOP halo ona esforsu hodi halo koordenasaun ho diretór planeamentu ho autoridade munisípiu nian hodi normaliza estrada públiku ne’ebé agora aat hela.

“Tanba ne'e, ohin iha ona apoiu mákina husi kompañia lokál balu no fasilita mina husi kompañia internasionál Shanghai hodi hadi’a, nune’e transporte sira bele movimentu hanesan baibain,” nia dehan.(*)