Tuir rezultadu teste SWAB ne'ebé hatudu iha ema na'in-21 mak hetan moras Covid-19, iha Munisípiu Ermera, maibé sira ho ulun tós hodi hela iha uma ho família sira, lakohi koopera ho parte saúde atu ba tama izolamentu, tanba la fiar rezultadu pozitivu.

Pasiénte Covid-19 na'in-21 iha Munisípiu Ermera, lakohi koopera ho pesoál Saùde, maibé parte autóridade seguransa, no ekipa saúde kontinua esforsu hodi evakua ema hirak ne'e ba izolamentu iha tempu badak.

Bainhira pasiénte hirak ne'e mak lakohi koopera nafatin mak, autóridade seguransa sei la tolera ona, no sei foti asaun disiplinar balu ba sira.

"Ami sei apoiu tótal ba saúde para obriga pasiénte sira hodi mai tama sala izolamentu, tanba ita hotu hatene, kazu ne'e, sira ne'ebè la koopera mak hodi Covid-19 mai Ermera, tanbasá sira lakoi koopera. Tanba ne'e ami la tolera ba hahalok sira hanesan ne'e, nune'e ami sei foti asaun bainhira sira nafatin la koopera”, dehan nia ba www tempotimor.com iha kna'ar fatin Gleno, Sesta (23/04).

Nune'e mós, Diretór Saúde Munisìpiu Ermera, António de Deus Fatima, rekoñese iha pasiénte Covid-19 na'in-21 mak la koopera ho atu tama sala izolamentu.

"Tanba ne'e, ekipa saùde nafatin esforsu servisu hamutuk ho Autóridade sira inklui PNTL no F-FDTL iha tempu badak sei foti pasiénte hirak ne'e ba izolamentu", dehan nia.

Pasiente Covid-19 na'in-21 ne'e, daudaun ida-idak hela de'it iha uma, seidauk ba izolamentu, tanba sira-nia parte lakohi koopera. (*)