"Señór Ministru, ha'u hanesan xefe do Suku Katrai Leten iha Letefoho, ami atu halo relatóriu balun ami hakerek de'it ho liman, iha ami-nia suku ne'e buat barak mak sei sabraut tebes, liliu komputadór, laptop, kuandu boot sira husu relatóriu balun hakarak ka lakohi tenke hakerek ho liman”, dehan Domingos Fernandes, iha Aldeia Riamori, Suku Haupu Postu Administrativu Letefoho Munisípiu Ermera, kuarta (13/10).
Tanba ne’e populasaun sira iha suku laran atu foti deklarasaun sira hodi asesu ba servisu balun difikulta tebes tanba komputadór no laptop iha suku laiha.
Ministru Administrasaun Estatál (MAE), Miguel de Carvalho Pereira hatete, iha tempu badak sei oferese fasilidade ne’ebé suku presiza atubele ajuda servisu iha suku laran.
"Dadaun ne'e iha suku 202 mak halo ona reabilitasaun, ha'u-nia prioridade ne'e mak hakarak hadi’a Sede suku sira ne'e hotu, se lalais liu iha Dezembru ne'e iha ita-boot sira-nia kantor ne'e iha komputadór, iha printer tau hotu iha ita-boot sira-nia kantor”, promete ina.
Tanba suku ne’ebé reabilita ona sei hetan mákina imprime no kompradór ida bainhira prosesu sira reabilitasaun hotu. (*)