Tuir dokumentu ne'ebé tempotimor.com asesu, funsionariu MNEK ho inisial EdS, uza osan estadu ho valor $49,504,95 ba interese privadu bainhira nia asume kargu nu'udar Sekretaria Daruak iha Embaixada Timor Leste iha Korea Sul periodu 2015-2016.

Osan ne'e nu'udar osan estadu ne'ebé atu uza hodi selu uma ne'ebé aluga ba edifisiu Embaixada TL iha Seoul, Korea Sul.

Iha 23 Marsu 2016, EdS halo resibu falsu ne'ebé eplika katak ajensia ne'ebé fó aluga, Ace Rent Real Estate Agency, simu ona pagamentu ho valor KWD 50,000,000 ka USD $49,504,95 ba aluga tinan ida no restu osan aluga ho valor KWD 20,800,000 sei selu iha 1 Novembru 2016. Resibu ne'e iha mós asinatura falsu husi Prezidente ajensia Ace Rent, Chris Kim.

Iha mós voucher pagamentu ho númeru 29, loron 26 Marsu 2016, hodi reforsa resibu pagamentu falsu ne'ebé halo ona.

Maibé, EdS la konsege subar kleur, tanba bainhira Embaixadora TL foun, Adalgiza, hala'o ninia misaun, ajensia Ace Rent sisi osan aluga uma.

Tuir informasaun husi fonte ne'ebé koñese di'ak kazu ne'e, bainhira ajensia ba sisi osan, embaixadora Adalgiza ho Adidu Trabaladór TL iha Korea mak hasai sira-nia osan privadu hodi selu.

Fonte ne'e hatutan, parte MNEK hatene kona-ba kazu ne'e, maibé koko atu taka de'it.

Informasaun ne'e reforsa ho karta deklarasaun husi EdS rasik iha 31 Marsu 2016 kona-ba aktu ne'ebé nia halo no promesa atu selu fila fali embaixadora no adidu ninia osan.

Iha karta refere EdS rekoñese katak nia halo mal-gastus ba osan aluga uma ba embaixada TL iha Seoul.

"Ha'u iha problema hodi halo mal-gastus ba osan arendamentu ba kanselaria bainhira ha'u nu'udar segundu sekretaria iha Seoul periodu 2015-2016," deklara EdS iha ninia karta ne'e.

Nia dehan, bainhira nia hasoru situasaun ida ne'e, embaixadora no adidu iha Seoul mak ajuda hodi selu osan aluga.

"Sr. Adido do Trabalho no Sra. Embaixadora mak fó apoiu ba ha'u hodi halo imprestimu ho sira-nia osan privadu."

Maske la deklara valor osan, maibé EdS dehan, nia promete atu selu fila fali osan refere iha Janeiru 2017. Maibé nia seidauk fó.

Iha 24 Marsu 2017, bainhira hasoru malu ho Diretór Jeral no Diretór Finansas MNEK, EdS promete tan atu selu iha 31 Marsu 2017.

"Maibé ha'u seidauk bele, tan ne'e ha'u husu tempu to'o dia 15 de Abril, no sei reembolsa osan hotu ne'ebé mak uza ona hodi selu ha'u-nia divida sira."

"Karik iha dia 15 de Abril de 2017 mak ha'u labele reembolsa mak ha'u sei submete ba MNEK nia desizaun," deklara EdS iha nia karta.

Maske nune'e, tuir fonte Tempotimor.com, to'o ohin loron EdS seidauk selu osan ne'ebé nia uza ona. Aat liu tan, nia hetan nomeiasaun hodi asume kargu xefia iha MNEK.

"Agora (EdS) fila ona ba MNEK serbisu nudar Dir***. To'o agora mós nia seidauk selu osan ne'ebé nia naok ne'e," dehan fonte ne'e.

Ba kazu ne'e, Ministru Negosiu Estranjeiru no Kooperasaun Dionisio Babo hatete, problema ne'e akontese kleur ona no daudauk ne'e submete ona ba Inspesaun Jeral Estadu.

"Lae, prosesu ne'e akontese kleur tiha ona, maibé agora problema ne'e submete tiha ona ba inspesaun jeral. Depois agora parese submete ona ba iha prokuradoria jeral ba prosesu, depois sira mak haree, sira mk tetu ba, se buat ruma akontese, se buat ruma duni mak prejudika duni nasaun nia orsamentu tenke lori ba legal, prosesu tribunal nian, hanesan normal," dehan Babo foin lalais.

Hatan kona-ba funsionariu refere sei serbisu iha MNEK ka sai ona, Ministru Babo dehan, nia parte kaer prinsipiu prejunsaun inosensia, katak bainhira tribunal seidauk foti desizaun, labele duun ema ne'e sala.

"Iha deskonfiansa iha prejuizu ba osan Estadu, ne'ebé, buat ne'e kleur loos tiha ona, mais foin mak tinan ida ikus ne'e ami haree no husu tiha ona ba inspesaun jeral estadu par ba halo sira-nia asesment depois haruka ba Funsaun Publika, depois agora faze ikus tenke submete ba iha prosesu judisial normal, ne'ebé ita hein de'it rezultdu final," dehan Ministru ne'e.