Print this page

Moras iha MS (parte 1), Deskonfia Odiu no Piska-matan Entre MS Interina Elia ho Prezidente KFP

By November 29, 2019 8709
Ministra Saude Interina, Elia dos Reis Amaral ko'alia hela ba jornalista sira iha Palasiu do Governu hafoin de partisipa iha seremonia aniversariu Proklamasaun Independensia Timor Leste ba dala 44, (28/11) Ministra Saude Interina, Elia dos Reis Amaral ko'alia hela ba jornalista sira iha Palasiu do Governu hafoin de partisipa iha seremonia aniversariu Proklamasaun Independensia Timor Leste ba dala 44, (28/11) Foto Especial

Tempotimor (Dili)-Hakarak husi Diretór Nasionál Aprovizionamentu (DNA) Ministériu Saúde (MS) Agapito da Costa hodi apoiu boa governasaun halo nia tenke prontu lakon ninia kargu bainhira Vise Ministra Elia dos Santos Reis Amaral tuur iha kadeira Ministra Saúde Interina ba fulan neen oin mai.

Ministériu Saúde nu’udar Ministériu ida ne’ebé seidauk iha Ministru, tan ne’e, kada fulan neen (6) Vise Ministru na’in rua troka malu hodi sai Ministru Interinu.

Hahú husi fulan Novembru 2019 to’o Juñu 2020, Elia mak sei assume kargu nu’udar Ministra Interina. Ho pozisaun ne’e Elia mós uza nia kompetensia hodi tebe sai DNA Agapito ne’ebé molok ne’e la aseita ho Vise Ministra Elia nia despaisu atu kontinua kontratu kombate barata iha Hospital Nasionál Guido Valadares (HNGV) no Hospital Referal Baukau (HRB).

Projetu komabate barata iha HNGV no HRB hahú implementa iha 14 Dezembru 2018 husi kompaña PPC Global Trading Unipesoal, Lda. ho ajudiksaun direita, ho orsamentu hamutuk $15.000 ba durasaun fulan tolu (3).

Hafoin projetu ne’e remata iha 14 Marsu 2019, Elia ne’ebé tuun ona husi kargu Ministra Interina no Bonifacio mak okupa fali kargu refere, hatuun despaisu ida atu kontinua projetu kombate barata.

Liu husi despaisu ho númeru referensia 346/GVMKSP/IV/2019, iha 8 Abril 2019, Vise Ministra kona-ba Kuidadu Saúde Primariu husu apoiu Kontinuasaun Kombate Barata iha HNGV.

Despaisu husi Vise MS Elia ne’e bazeia ba pedidu husi HNGV ho númeru referensia 154/Gab/DE/HNGV/IV/2019, iha 4 Abril 2019.

Maske Vise MS Elia hasai aprova ona, maibé, DNA Agapito la konkorda ho razaun katak presiza loke tenderizasaun ba projetu Kombate Barata.

Ho nune’e, hafoin Elia troka fila fali Bonifacio nu’udar Ministra Saúde Interina, nia foti desizaun hodi troka DNA Agapito tanba konsidera diretór ne’e la serbisu tuir regra no estandarizasaun MS nian.

“Ida ne'e (hasai Diretór) tuir ha’u-nia kompetensia, kuandu diretor ne'ebé la halo serbisu tuir regularidade no estandarizasaun ou protokolu serbisu ne'ebé mak iha, ha’u presiza hasai dezisaun ne'ebé rigorozu atu nune'e ba oin labele halo tuir fila fali,” deklara Elia ba Tempotimor.com bainhira hetan konfirmasaun.

Agapito sai DNA iha 5 Janeiru 2016. Nia mandatu hetan renovasaun kada tinan, maibé iha tinan ida ne’e, mandatu husi atual DNA Agapito, tuir fonte ne’e sei remata iha fulan Dezembru tinan ne’e, maibé MS Interina hakarak atu hasai ona molok ninia mandatu remata.

Maske nu’udar Ministra Interina, Elia iha kompetensia hasai no troka DNA, maibé tuir fonte ida ba Tempotimor.com, tuir regra funsaun públika nian, bainhira funsionariu ida komete sala presiza fó uluk karta xamada, la’os foti kedan desizaun hodi hapara.

“Diretór ne’e (DNA Agapito) nunka hetan xamada atensaun, maibé derepente de’it Ministra Interina hasai ona desizaun, no Prezidente KFP mós reafirma desizaun Ministra Interina hodi hasai diretór ne’e,” dehan fonte ne’e.

Deskonfia “Piska-matan” Entre Elia ho Faustino

Prezidente Komisaun Funsaun Públika (KFP) Faustino Cardoso Gomes, foti ona desizaun hodi hasai Diretór Nasionál Aprovizionamentu (DNA) Ministériu Saúde (MS) Agapito da Costa bazeia ba karta husi Ministra Saúde Interina Elia dos Santos Reis Amaral.

Liu husi karta desizaun ne’ebé asina husi Prezidente KFP Faustino iha 19 Novembru 2019, ho númeru 3434/2019/CFP, deside hasai atual DNA Agapito no nomeia Alberto Martins Chan nu’udar DNA foun hahú husi 1 Dezembru 2019.

Fonte ida ne’ebé koñese kazu ne’e deskonfia iha kongkalikong entre MS Interina Elia ho Prezidente KFP Faustino hodi hasai DNA Agapito.

Fonte ne’ebé lakohi públika ninia identidade ne’e inform aba Tempotimor.com katak, Prezidente KFP “obrigatoriu” tenke “a favor” ba desizaun MS Interina Elia tanba Elia hatene kona-ba kazu ida ne’ebé komete husi KFP nia oan-mane ne’ebé loke klinika ida iha Dili laran.

Atu “salva” nia oan-mane, fonte ne’e dehan, Prezidente KFP mós halo tuir “orden” ne’ebé MS Interina Elia fó sai no haruka ba KFP. Tan ba dehan klinika husi Prezidente KFP nia oan-mane nian ne'e hetan ona investigasaun husi parte Ministeiru Saude no iha ameasa atu taka.

Bainhira jornalista Tempotimor konfirma asuntu ne’e ho Prezidente KFP Faustino, nia rekuza atu esplika karta Desizaun ne’ebé nia hasai.

Elia: Hasai Diretór, Ha’u-nia Kompetensia

Entretantu, Ministra Saude Interina, Elia dos Reis Amaral hatete, nia foti desizaun hodi hasai diretór ida iha MS hodi submete ba KFP tanbá diretór ne’e komete iregularidade.

"Ida ne'e tuir ha’u nia kompetensia, kuandu Diretór la halo serbisu tuir estandarizasaun ou protokolu serbisu ne'ebé mak iha, ami presiza hasai dezisaun ne'ebé rigorozu atu nune'e ba oin labele halo tuir fila fali," dehan Elia iha Palasiu Governo, Kinta (28/11/19).

Iha intervista ho Tempotimor, Elia afirma, nia foti desizaun refere tanba diretór ne’e komete iregularidade.

“Iha iregularidade uitoan entaun bele hatama ba iha ou submete ba, oinsa entrega ba Funsaun Publika atu hadia ba iha komportamentu sira ne'ebé mak halo durante ne'e,” Elia esplika.

Hatan kona-ba deskonfia kongkalikong entre MS Interina Elia ho Prezidente KFP, Ministra Interina ne’e litik fila fali kona-ba fonte ne’ebé fó informasaun ba Tempotimor.com.

“Fontes ne'e husi ne'ebé?. Fontes presiza forte, kuandu ema ida koalia ne'e ita haree ba hanesan ita bele dehan entre aspas bisa dipertanyakan, ne'ebé kestaun sira ne'e la presiza atu koalia tan, i ita haree ba saida mak progressu serbisu ne'e halo internalmente ministeriu sei rezolve,” katak nia.

Rate this item
(2 votes)
Last modified on Monday, 02 December 2019 11:11
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items