Bainhira governu AMP hahú funsiona ho pose ba Primeiru Ministru no membru governu balun, Ministériu Saúde nu’udar ministériu ida ne’ebé laiha ministru, so iha de’it Vise Ministru na’in rua; Vise Ministru kona-ba Kuidadu Saúde Primaria ne’ebé okupa husi Elia A.A. dos Reis Amaral, no Vise Ministru Dezenvolvimentu Estratejiku Saúde Bonifacio Mau Coli dos Reis.
Vise Ministra Elia hetan oportunidade dahuluk hodi tuur iha kadeira Ministra Saúde Interina ho durasaun fulan neen. Iha ninia tempu Elia hasai despaisu ida ho númeru 08/2018/XI/VMS, iha 6 Novembru 2018, hodi kria Komisaun Avaliasaun ba Proposta Kotasaun, Konkursu Públiku Nasional no Internasional, Bens no Serbisu no Kapital Menor Ministériu Saúde.
Iha ninia despaisu ne’e, Elia nomeia ema na’in lima; Agostinho da Cunha (prezidente), Manuel M. Martins (sekretariu), João Bras Belo (membru efetivu), Albino Soares (membru suplente), no Elizitu Barreta Araujo (membru suplente), hodi serbisu iha komisaun refere.
Hafoin Elia nia tempu dahuluk nian nu’udar Ministra Interina remata, Maucoli hetan hikas oportunidade hodi sai Ministru Interinu ba fulan neen.
Iha ninia tempu, Maucoli hasai despaisu númeru 28/VII/MS-DES/MSI/2019, iha 31 Jullu 2019, hodi revoga ka hasai despaisu númeru 08/2018/XI/VMS, iha 6 Novembru 2018, kona-ba kriasaun no nomeiasaun Komisaun Avaliasaun ba Proposta Kotasaun, Konkursu Públiku Nasional no Internasional, Bens no Serbisu no Kapital Menor Ministériu Saúde.
Liu husi despaisu ne’e, Mau Coli nomeia ema na’in haat; José Manuel Gonçalves (prezidente), Herculano da Silva Garcia (Sekretariu), Lino Soares (membru efetivu), no Aquiles Pinto (membru suplente), hodi troka na’in lima ne’ebé molok ne’e Elia nomeia.
Maibé, hafoin fulan tolu, bainhira Elia Elia sa’e fali ba Ministra Saúde Interina, nia hasai fali despaisu ida ho númeru 15/2019/XI/VMS, iha 7 Novembru 2019, hodi revoga ka hasai despaisu númeru 28/VII/MS-DES/MSI/2019, ne’ebé públika iha 31 Jullu 2019.
Elia nomeia fila fali ema foun na’in tolu; Silveiro Barreto do Carmo (prezidente), Belchior Soares (sekretariu), no Carlos Maya Martins (membru efetivu), hodi troka ema na’in haat ne’ebé Mau Coli nomeia.
Ho “funu” despaisu ne’ebé Elia ho Mau Coli hala’o iha MS ne’e, durante tinan ida ho balun mosu ona mudansa dala tolu iha Komisaun Avaliasaun ba Proposta Kotasaun, Konkursu Públiku Nasional no Internasional, Bens no Serbisu no Kapital Menor Ministériu Saúde.
Tuir informasaun husi fonte ne’ebé koñese lalaok iha MS ba Tempotimor.com katak, ho pozisaun Ministru Interinu ne’ebé troka-malu kada fulan neen hamosu kompetisaun entre Vise MS na’in rua.
“Ezemplu konkreta mak troka estrutura komisaun de avalisaun projetu. Bainhira Vise Elia mak asume kargu (Ministra Saúde) Interina, monta ema ne’ebé nia konfia, mais kuandu Vise Bonifacio (Mau Coli) mak sa’e (ba Ministru Saúde Interinu), nia troka hotu kedan,” informa fonte ne’ebé lakohi públika ninia identidade.
Fonte ne’e hatete, hahalok husi Ministra Interina Elia mak sai preokupasaun boot ba nia. Tanba bainhira Mau Coli nomeia membru komisaun sira no sira serbisu foin fulan tolu, Elia hatuun despaisu hodi troka hotu.
“Ema sira ne’e foin serbisu fulan tolu, Vise Elia nia tempu hodi assume hikas kargu Ministra Interina nune’e nia hasai hotu ema sira ne’ebé vise Bonifacio (Mau Coli) monta hodi troka fali ho ninia ema sira,” katak fonte ne’e.
Entretantu, bainhira Tempotimor.com konfirma kona-ba troka-malu pozisaun MS Interinu ba atual Ministra Saúde Interina Elia, nia hatete ida ne’e kompetensia Primeiru Ministru Taur Matan Ruak.
"Ida ne'e kompetensia ami-nia Xefe Governu, ha’u labele responde pergunta ne'e tanbá kompetensia ne'e xefe governu nian," dehan nia.
Hatan kona-ba karik iha kompetisaun entre nia ho Mau Coli, Elia deklara katak, durante ne’e nia ho Vise MS Mau Coli koopera malu ho di’ak.
“Não (laiha kompetisaun), (serbisu) kapa’as loos. Ami halo serbisu kapa’as loos. Ami koopera ho di’ak atu nune'e bele lori ministériu ne'e ba oin,” dehan Elia.
