Moras iha MS (parte 3), Desizaun Elia no Krize Boot iha Aprovizionamentu MS

Ministra Saúde Interina Elia dos Santos Reis Amaral, ko'alia hela ho Jornalista sira iha Palasiu do Governu hafoin partisipa seremonia loron independensia ba dala 44, Dili (28/11) Ministra Saúde Interina Elia dos Santos Reis Amaral, ko'alia hela ho Jornalista sira iha Palasiu do Governu hafoin partisipa seremonia loron independensia ba dala 44, Dili (28/11) Foto Tempotimor.com

 Tempotimor (DILI)-Desizaun Ministra Saúde Interina Elia dos Santos Reis Amaral hodi hasai Diretór Aprovizionamentu Ministériu Saúde Agapito da Costa la’os de’it hamosu deskonfiansa, maibé mós hamosu krize boot ida iha aprovizionamentu ministériu ne’ebé daudauk ne’e Elia lidera hela.

Hanesan Tempotimor.com públika ona antes, Ministra Saúde Interina Elia foti desizaun ida hodi hasai Diretór Nasionál Aprovizionamentu (DNA) Agapito da Costa hodi troka ho Alberto Martins Chan. Desizaun ministra interina ne’e hetan “a favor” husi Prezidente Komisaun Funsaun Públlika Faustino Cardoso Gomes.

Lee mós: Moras iha MS (parte 1), Deskonfia Odiu no Piska-matan Entre MS Interina Elia ho Prezidente KFP

Desizaun ne’ebé Ministra Interina Elia foti ne’e la’os de’it hamosu deskonfiansa katak Elia “odiu” DNA Agapito ne’ebé la konkorda ho desizaun atu kontinua projetu kombate barata iha ospital, maibé hamosu impaktu real ba serbisu aprovizionamentu MS.

Tuir fonte ne’ebé hatene moos prosesu ne’e ba Tempotimor.com katak, hafoin Elia desiza troka DNA Agapito, prosesu pagamentu hotu-hotu iha MS baraladu, tanba prosesu hotu-hotu iha aprovizionamentu MS uza user DNA Agapito.

“Hafoin mudansa sira ne’e, krize boot ida ba aprovizionamentu (MS) tanba kuaze PO (proses order) 70 ne’ebé tama ona sistema maibé seidauk print sai tenke kansela hotu kedas, tanba user ne’ebé Diretór tuan asina ne’e to’o de’it Sesta (29/11),” informa fonte ne’ebé lakohi públika ninia identidade, Sabadu (30/11).

Nia esplika, hahú husi Segunda (02/12), DNA Agapito labele asina ona PO no PO hirak ne’ebé seidauk imprimi (print) tenke kansela hotu.

“Ofisial aprovizionamentu sira preokupa tebes tanba se sira kansela sei fó impaktu ne’ebé maka’as tebtebes ba ezekusaun, dala-ruma dividas Ministériu Saúde bele sa’e to’o tokon $3 resin,” dehan nia.

Ba daudauk ne’e, nia informa, husi PO 70 resin ne’ebé kansela iha total orsamentu hamutuk tokon $2 resin.

Númeru ne’e, nia hatete, seidauk aumenta ho projetu no tenderizaun ne’ebé daudauk ne’e la’o hela, inklui mós pagamentu ba ambulansia ne’ebé to’o ona iha Portu Dili. MS sosa ambulansia 16 ho orsamentu kuaze rihun $90.

“Ambulansia ne’ebé Ministériu Saúde sosa agora to’o ona portu Dili, atu hasai tenke halo ona pagamentu, agora halo pagamentu ida ne’e presiza user ida diretór foun ne’e,” dehan nia.

Maibé, prosesu atu troka user husi diretór tuan ba diretór foun, fonte ne’e dehan, presiza haan semana tolu.

“Mudansa ne’ebé ministra interina (Elia) halo iha tempu agora ne’e fó impaktu boot ba ezekusaun ministériu saúde nian,” dehan nia.

Bainhira prosesu troka user ne’e seidauk hotu, fonte ne’e dehan, durante semana tolu ba oin DNA foun no ofisial sira iha aprovizionamentu MS sei tuur de’it.

“Agora ba oin, durante semana tolu ne’e sira sei deskansa total, tanba user laiha sira atu halo oinsa?, user foun laiha sira labele halo buat ida, ne’ebé hanesan pagamentu ne’ebé mak liu husi sistema aprovizionamentu ne’e paradu total,” dehan nia.

Bainhira sura hamutuk PO ho pagamentu sira seluk, tuir nia, MS sei iha divida to’o tokon $3 resin, tanba prosesu pagamentu hotu-hotu sei taka iha 20 Dezembru tinan ne’e.

“20 Dezembru ne’e loron ikus atu ita tenke submeter hotu ona pagamentu sira, se la konsege iha dia 20 tenke rai ba tinan oin,” dehan nia.

Karta Husu Konfirmasaun husi Agapito

Entretantu, iha 29 Novembru 2019, DNA Agapito da Costa haruka karta ida ba Prezidente Komisaun Funsaun Públika Faustino Cardos Gomes hodi husu konfirmasaun kona-ba desizaun karta desizaun númeru 3434/2019/CFP.

Iha ninia karta ne’e, Agapito kesiona desizaun Prezidente KFP ne’ebé konsidera DNA Agapito kontra Dekretu Lei númeru 25/2016, kona-ba Rejime Kargu Diresaun Xefia Administrasaun Públika, artigu 15, pontu “a” ne’ebé.

Agapito dehan, bainhira nia lee didi’ak pontu “a” husi artigu refere, nia intende katak, nu’udar DNA nia laiha kapasidade atu asegura implementasaun orientasaun husi superior, no la halo tuir regra no regulamentu ne’ebé vigora ka la realiza objetivu ne’ebé estabelese ba serbisu ne’ebé DNA Agapito lidera.

“Haree husi kontestu lei iha leten, serake karta demisaun ne’ebé Sra. Vise Ministra Saúde CSP e Ministra Interina haruka ba ita-boot (Prezidente KFP) ne’e loos ou tanba iha intensaun seluk ruma? Tanba realidade laiha koñesimentu ruma husi S.E. Sr. Vise Ministru Dezenvolvimentu Estratejiku Saúde ne’ebé Diresaun Nasionál Aprovizionamentu tutela, tuir delegasaun kompetensia númeru 579/GPM/IV/2019. Inkui mós Diretór Jeral Serbisu Kooperativos laiha koñesimentu,” dehan Agapito.

Nia mós husu ba Prezidente KFP, karik nu’udar diretór nia halo sala bainhira fullow up hela serbisu sira ne’ebé pendente.

“Ezemplu, pagamentu ba kontratu sira balun ne’ebé tenke rai to’o fulan 8 nia laran mós labele selu, serake ne’e sala? no hanesan ema ne’ebé responsavel ba area ne’e kuandu follow up ne’e sala fali?.

“Pedidu kompra balun ne’ebé haruka atu hetan aprovasaun maibé rai kleur iha asesor sira no bainhira ha’u levanta asuntu ne’e iha enkontru konsellu nia laran ha’u kulpa?,” nia husu.

Agapito dehan, iha desizaun ida ne’ebé nia parte la implementa tanba osan laiha no nia parte halo karta eskrita ba Diresaun relevante atu aloka orsamentu maibé prosesu mak kleur tebes.

“Serake ne’e kulpa husi Diretór Nasionál Aprovizionamentu nian? La’os husi Diresaun relevante/utente?,” nia dehan liu husi ninia karta.

Maske nune’e, Agapito dehan, nu’udar funsionariu públiku nia aseita ho desizaun hasai nia husi kargu DNA tanba kargu no xefia la’os permanente ba funsionariu ida, maibé nia ladun konkorda tanba desizaun ne’ebé tuun hanesan derrepente de’it.

Nia dehan, nia mandatu nu’udar DNA loloos sei remata iha 31 Dezembru no daudaun ne’e prosesu selesaun por meritu andamentu hela, maibé derepente de’it desizaun ezonerasaun akontese, tanba ne’e, Agapito konsidera nia presiza atu hatene motivu husi desizaun ne’e.

“Serake durante ha’u-nia mandatu okupa kargu Diresaun halo erru boot ruma? Karik erru ruma akontese, serake iha xamada eskrita ruma ne’ebé haruka mai ha’u atu hadia erru sira ne’e? Realidade hatudu katak ate agora ha’u nunka simu kualker karta xamada ruma husi jestór ministériu saúde,” nia dehan.

Agapito hatete mós katak, atualmente iha separasaun poder iha prosesu aprovizionamentu iha MS, kompostu husi Komisaun Avaliasaun Proposta ne’ebé independentemente hetan nomeiasaun direita husi Ministra Interina Elia no la envolve membru ruma husi Diresaun Nasionál Aprovizionamentu.

Lee mós: Moras iha MS (parte 2), “Funu” Despaisu MS Interinu, Kada Fulan 6 Troka Komisaun Avaliasaun ba Projetu

“Komisaun (Avaliasaun Proposta) simu dokumentus no halo abertura e komisaun (halo) inspesaun no resepsaun. Diresaun Nasionál Aprovizionamentu so prosesa de’it dokumentus konkursu no halo kontratu no nunka involve iha prosesu hola desizaun ruma. Oinsa bele dehan viola regras no prosedimentu sira?,” Agapito kestiona.

Rate this item
(0 votes)
Last modified on Monday, 02 December 2019 11:08
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Anunsiu

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com