Tuir lista ne’ebé molok ne’e Ministériu Finansas haruka ba Parlamentu Nasionál (PN), asesor iha Ministériu Saúde (MS) ne’ebé daudauk ne’e lidera husi Ministra Saúde Interina Elia dos Santos Reis Amaral hamutuk ema na’in 30, kompostu husi asesor internasional na’in 13 no asesor nasional na’in 17.

Lee mós: Iha Governu AMP, Ministériu Ida Asesor to’o na’in 192

Maibé, tuir dadus ne’ebé Tempotimor.com asesu, asesor ne’ebé hetan kontratu husi MS hahú husi 2018 to’o 2019 hamutuk ema na’in 41. Iha lista ne’e la klasifika asesor nasional no internasional.

Tuir dadus ne’e, husi asesor na’in 41 ne’e, na’in 12 mak ninia kontratu remata ona entre fulan Fevereiru to’o fulan Setembru 2019. Signifika daudauk ne’e hela asesor na’in 29 mak ativu hela hodi fó konsellu ba lider sira iha MS. Maioria asesor iha MS ho durasaun kontratu serbisu tinan ida.

Atu aselu asesor na’in 41 ne’e, iha tinan ida nia laran, 2018 to’o 2019, MS gasta osan hamutuk millaun $1.244.948,79.

Asesor hirak ne’e selu ho nivel salariu ne’ebé diferente. Asesor ho salariu kiik liu mak hahú husi $400 to’o $660. Iha asesor na’in neen (6) mak selu ho salariu $400 kada fulan, asesor na’in ida (ida) ho salariu $500 kada fulan, asesor na’in ida (1) ho salariu $600 kada fulan, no asesor na’in ida ho salariu $660 kada fulan.

Nivel salariu tuir mai hahú husi $1.000 to’o $4.000. Asesor na’in ida simu salariu $1.000 kada fulan, na’in ida simu $1.100 kada fulan, na’in ida simu $1.500 kada fulan, na’in ida simu $1.600 kada fulan, no na’in ida simu $1.775 kada fulan.

Asesor ho nivel salariu $2.000 kada fulan iha na’in rua (2), salariu $2.250 na’in ida, salariu $2.200 na’in ida, no salariu $2.500 na’in rua.

Nivel salariu $3.000 kada fulan iha na’in rua (2), salariu $3.200 na’in ida, $3.400 na’in rua, no $3.500 na’in tolu (3).

Asesor ho nivel salariu $4.000 na’in rua, $4.200 iha na’in rua, $4.250 na’in tolu (3), no $4.675 kada fulan iha na’in ida.

Ba nivel tuir mai, asesor iha asesor na’in lima (5) mak simu salariu kada fulan hahú husi $6.000 to’o $12.000. Asesor na’in ida simu salariu $6.000, na’in ida simu $7.500, na’in ida simu $9.500, na’in ida simu $11.000, no na’in ida simu $12.000.

Asesor ho durasaun kontratu badak liu mak fulan tolu ho salariu $500 kada fulan, no tuir mai fulan hitu (7) ho salariu $3.500 kada fulan, no asesor ho durasaun kontratu naruk liu mak tinan tolu, hahú husi Maiu 2019 no sei remata iha Juñu 2022, ho salariu kada fulan $4.250.

Iha mós asesor na’in ida ne’ebé asina kontratu iha Janeiru 2019 no ninia kontratu sei remata iha Dezembru 2019 ho salariu $1.500 kada fulan, maibé to’o iha fulan klaran, iha Maiu 2019, iha renovasaun ba ninia kontratu, ne’ebé hahú fali iha Maiu 2019 no sei remata iha Maiu 2020 ho salariu kada fulan $2.500.