Aman Asesor iha MOP, Oan Raut Projetu

Dokumentus short list husi MOP Dokumentus short list husi MOP foto suplai

Tempotimor (DILI): Kompaña konsultan Baekmoon Unipesoal Lda sai kompaña ne'ebé hetan sorte di'ak liu. Imajina de'it, hafoin fó serbisu ba asesor prinsipal Ministériu Obras Publika (MOP), Jorge da Conceição Teme nia oan mane, kompaña ne'e iha posibilidade boot atu raut projetu husi MOP. Kompana konsultan sira ne'ebe tuir tender projetu sira mak kompna Baekmoo partisipa hahu deskonfia kona ba lala'ok tender ne'e.

Iha 22 Jullu 2019, assessor prinsipal MOP nia oan mane, Luzerio Donzilio Junior da Conceicão Teme, asina kontratu ho kompaña Baekmoon Unipesoal Lda nu'udar Enjineiru Kontrolu Projetu (Project Control Engineer).

Tuir dadus ne'ebé tempotimor.com asesu, Luzerio Teme ne'ebé nu’udar Baserelatu Jeolojia Petroleu ne’e hatama pedidu no hetan kontratu serbisu durante fulan haat, hahú husi fulan Jullu no sei remata iha 22 Outubru 2019, ho salariu $400.00 kada fulan.

Luzerio Teme, oan mane husi eis Ministru Estatal Jorge Teme, hala’o nia estudu iha area Petroleu Jeolojia iha Universidade Oklahoma, Estadus Unidus Amerika, hahú husi tinan 2014 to’o 2018.

Hafoin Luzerio Teme serbisu iha Baekmoon, kompaña ne'e mós hetan benefisiu tanba bainhira MOP loke konkursu ba projetu estudu viabilidade no dezeñu detaladu ba estrada no ponte 2019, kompaña ne'e liu iha shortlist ba projetu 8.

Bazeia ba rezultadu shortlist husi Diresaun Jeral Administrasaun no Finansa MOP, kompaña Baekmoon sai nu’udar uniku kompaña ne’ebé konkore iha projetu barak liu no iha dia 17/09/2019 kompana refere halo on a aprezentasaun iha MOP.

"Ami tuir projeitu barak ona no situasaun sira hanesan ne'e mosu ona. Ami sira ne'e ba hatama dokumentus hodi kompleta de'it sira nia rekezitus mas manan nain ita bele hatene on a," dehan reprezentante kompana ida ne'ebe husu tempotimor.com labele publika nia identidade.

Previlejiu espesial merese atu atribui ba kompaña Baekmoon ne’ebé konsege tama iha shortlist ba projetu 8, no entre projetu ne’e, iha projetu neen (6) mak kompaña ne’e okupa númeru dahuluk no projetu rua seluk okupa númeru daruak.

Tempotimor.com koko atu konfirma ho Asesor Prinsipal MOP nune'e tempotimor.com hakat on a ba MOP maibe dehan 'la iha fatin', liga telefone la simu no koko mos konfirma ho kompana Baekmoon maibe ate notisia ne'e hatun ami seida'uk konsege.

Rate this item
(12 votes)
Last modified on Monday, 23 September 2019 08:34
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com