Tempotimor (Maliana ) – Eis Padre RD ne’ebé deskonfia komete krime abuzu sexuál hasoru minoridade iha uma mahon Topu Honis, Oécusse hakarak tama prizaun.

“Nia hakarak entrega an ba Polísia. Hakarak tama komarka,” Padre Lazarus Mau, SVD ulun boot kongregasaun Societas Verbi Divini (SVD) nian, iha Maliana ba tempotimor.com, Kuarta (13/11/19).

RD, tuir Padre Lazarus sai husi uma SVD iha Maliana, iha Tersa (12/11/19) dadersan ba Dili. To'o Dili, iha lokraik loron hanesan, RD sa’e Ró naran Succes, hodi kontinua nia viajen ba Oécusse.

“Nia ba tiha ona horiseik, depois sa’e ró ba Oécusse. Iha Maliana mós nia fó hatene ona ba Polísia. Nia rasik hakarak ba Oécusse. Depois to’o iha ne’ebá nia hakarak Polísia kaer nia lori ba komarka,” Padre Lazarus haktuir.

RD, tuir Padre Lazarus hetan akompanamentu husi señora Lili (atuál Diretora Topu Honis) ho ninia ema sira ne'ebé mai hasoru RD iha Maliana. “Sira to’o iha ne’e maizumenus tuku 07.15, depois sira sai husi ne’e ho karreta pickup ida maizumenus tuku 08.00 dadersan iha Tersa (12/11/19),” Padre Lazarus esplika.

Dezde Abril 2019, suspetu RD hela iha rezidénsia SVD iha Maliana, tuir aranju ne’ebe hanaran ‘House Arrest’.

“Nia dehan, nia lakohi subar tan iha ne’e,” hatete Padre Lazarus Mau.

Iha Segunda (11/11/19) eis saserdote ne’e ba aprezenta an iha eskuadra PNTL Munisípiu Maliana no husu kona-ba ninia kazu. Maibé, PNTL Maliana hateten ba RD katak ninia kazu ne’e monu iha PNTL Oécusse, nia responsabilidade.

Ne'ebé, bainhira RD to’o iha Oécusse, dadersan sedu loron Kuarta (13/11/19), Polísia sira preparadu ona iha portu Mahata, hodi kaer RD no lori kedan ba eskuadra PNTL Oécusse.

Iha fulan Abril liubá, Polísia Timor-Leste kaptura ona eis-padre Amerikanu ne'e. Autoridade legál mós prende nia pasaporte. Amlulik Lazarus Mau hatete, antes ne’e RD la hetan detensaun. Parte legál no igreja permite eis-padre ne'e hodi hela iha rezidénsia SDV nian iha Maliana ho razaun katak nia katuas ona, nomós konsidera ninia kontribuisaun ba Timor-Leste.

Bainhira intervista ho tempotimor.com loron 17 Setembru liubá, Padre Lazarus Mau ne’ebé ho idade 69 hateten, Rezidénsia SVD Maliana nu'udar fatin ne'ebé seguru. “Ha'u katuas ona, nia mós (RD) katuas ona," hatete Padre Lazarus.

Maski nune'e, nu'udar ulun boot SVD nian iha Maliana, Lazarus iha responsabilidade hodi kontrola suspeitu RD . “Bainhira nia ba merkadu, frater ida tenki akompaña nia. Ha'u rasik mak deside katak ema ruma bele mai vizita nia ka lae,” Lazarus esplika.

Tuir Lazarus, baibain se estudante ka ema ruma hosi Oécusse mak hakarak mai haree RD, ida ne'e la problema. Nune’e mós atuál Diretora Topu Honis, señora Lily Tarung ne'ebé bainhira ba vizita RD iha Maliana, sira tenki hasoru malu iha liur. La'ós iha rezidénsia SVD.

Fotográfia ida iha Instagram, hatudu katak suspeitu tuur hela iha restaurante ida iha Maliana hodi halimar laptop, bainhira señora Lily Tarung hemu hela serveza. Lili Tarung lakohi simu alegasaun hasoru nia xefi. Maske iha 2018, iha momentu wainhira RD konfesa ba doadór ida hosi Austrália naran Tony Hamilton katak nia komete duni abuzu seksuál. Tarung mós iha ne'ebá hodi asiste. Hamilton hateten, RD konfesa ba nia katak nia sempre halo abuzu seksuál ba labarik sira iha Topu Honis.

Informasaun balun hatete, iha mós alegasaun hasoru Señora Lili Tarung, tanba nia konsidera falla hodi proteje labarik sira iha Topu Honis.

Bainhira RD hetan kapturasaun iha Abril, Tarung haruka mane ida hodi ataka feto ida ne’ebé uluk hela iha orfonatu no iha ona oan ida ne’ebé nia deskonfia katak fó ona testemuña ba parte legál sira.

Feto ne’e hetan baku nune’e hetan kanek. Tarung mós hetan detensaun temporáriu. Maibé, hahalok violente ne’e halo eis orfonatu sira iha Topu Honis aumenta ta'uk atu ko'alia sai. Tanba sira tauk ema atu asalta ka ataka sira. Sira kontinua fó presaun ba pesoál sira iha Topu Honis. Nune’e mós sira ne’ebé hela besik iha ne'ebá.