Reprezentante familia CF ne’ebé sai vitima ba kazu insestu, José Soares lamenta ho prosesu julgamentu iha Tribunal Distrital Dili (TDD).
José dehan, situasaun ida ne’e halo sira lakon ona konfiansa ba justisa iha rai ida ne’e.
"Ha’u-nia alin nia kazu ne'e kleur ona, dezde 2017, maibé julgamentu ne'e sempre adia hela de’it. Juiz sira nia gaji boot maibé loron ida mai dehan sira sibuk, okupadu, be ami mós la okupadu ou oinsa?.”
"Ami nia familia mak halo kazu ne'e ba alin maibé sira atu halo julgamentu prosesu naruk los, iha abril liu ba dehan atu julga to'o mai dehan juiz preokupadu, agora mos tunda fali tan", dehan José, Tersa (26/11/19).
Nia konsidera katak justisa iha Timor Leste sei fraku, tanba maske kazu ne’e konsidera perigozu maibé tribunal sente baibain de’it no la preokupa.
“Karik kazu insestu ne'e vitima la’o di’ak ou lae? seguru ou lae?”, nia preokupa.
Nia husu ba parte kompetente sira atu bele trata ho di’ak kazu hasoru labarik sira tanba labarik ne’e iha risku boot liu no sei lakon ninia futuru.
“Eskola mós la ba no hein prosesu kle’ur sei halakon fiar ba estadu no rai ida ne'e,” nia afirma.