Autoridade TL Prende Droga Kilograma 3 Liu iha Aeroportu, Ka'er Suspeitu Iha TP

Evidensia Droga Sabu-Sabu (Kristal) ne'ebe kaptura husi Autoridade TL iha Aeroportu Dili Evidensia Droga Sabu-Sabu (Kristal) ne'ebe kaptura husi Autoridade TL iha Aeroportu Dili Foto Suplai

Tempotimor (Dili)-Ekipa konjunta ne’ebé kompostu husi Ministériu Públiku, Serbisu Investigasaun Kriminal Nasionál (SIKN), PSIK no parte intelijensia konsege deteta no prende droga tipu sabu kilograma 3 liu grama 253 iha aeroportu internasional Nicolau Lobato Komoro, Dili.

Tuir informasaun ne’ebé Tempotimor.com asesu, droga ne’e haruka husi ema Nijeria ida ho inisial VK mai Timor-oan ida ho inisial CMB.

Droga ho kilograma 3 resin ne’e hatama iha kompresor AC karreta nian no solda metin.

VK haruka kompresor AC ne’ebé nakonu ho droga ne’e iha 17 Dezembru 2019 liu husi DHL no to’o iha Timor Leste ho aviaun Citi Link iha 6 Janeiru 2020.

Hafoin autoridade Timor nian identifika, iha 14 Janeiru 2020 prende droga ne’e no halo mós kapturasaun ba suspeitu ho inisial CMB hotel Timor Plaza.

Tuir informasaun ne’ebé Tempotimor.com hetan husi fonte ida husi autoridade ne’ebé envolve iha operasaun ba droga ne’e katak hafoin identifika droga ne’e, nia parte koko atu kontaktu ema ne’ebé atu simu droga refere.

“Ami kontaktu mais labarik ne’e nia telemovel hamate tiha, ne’ebé ikus mai ami-nia ekipa ba halo kapturasaun iha nia hela fatin, nia hela iha otel ida iha Dili,” informa fonte ne’e via telemovel, Kuarta (15/01).

Tuir fonte ne’e, suspeitu CMB konfesa katak VK haruka droga ba nia dala rua ona. Ba dahuluk, CMB konsege haruka ba Indonezia liu husi travel Dili-Kupang.

“Ba dala rua ne’e mak ita konsege kaer ona ne’e,” hatete fonte ne’e.

Ba autoridade sira, fonte ne’e hatete, CMB dehan katak nia koñese VK liu husi facebook no sira hahú negosia hodi distribui droga husi Nijeria mai Timor Leste no sei haruka ba Indonezia.

“CMB dehan VK selu nia $700, maibé ita la fiar, ne’ebé prosesu ne’e ita sei kontinua nafatin,” dehan fonte ne’e.

Autoridade ne'e kestiona serbisu  alfandega nian iha rai ketan tan ba Timor Travel entre Dili - Kupang hamosu duvidas wainhira CMB informa, sira uza transporte publiku tula droga ba Indonezia. Autoridade be'e hateten Droga Kilograma 3 ;iu grama 253 ne'e fa'an hotu bele hetan osan tokon 2 ate tokon 3,

Rate this item
(0 votes)
Last modified on Thursday, 16 January 2020 01:30
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.