Nota ba Diretór AJAR: MJ Carceres mak Autór ba Lei Difamasaun, La’os Fidelis

Ministru Justica VIII Governu Konstitusional no Autor ba draft Kriminalizasaun Difamasaun, Dr. Manuel Cárceres ko'alia ba Jornalista sira iha Palasiu Governu Ministru Justica VIII Governu Konstitusional no Autor ba draft Kriminalizasaun Difamasaun, Dr. Manuel Cárceres ko'alia ba Jornalista sira iha Palasiu Governu Foto File Tempo Timor

Tempotimor (Dili)-Durante semana hirak ikus ne’e mosu argumentu lubuk ida husi públiku kona-ba Lei Difamasaun, iha argumentu balun ne’ebé ho razaun, maibé mós iha argumentu seluk ne’ebé “narnaran” de’it.

Ezemplu kiik ida mak argumentu husi Diretór Ezekutivu Asia Justice and Right (AJAR) José Luis Oliveira ne’ebé hato’o liu husi nia pajina facebook “Ze Luis Oliveira”.

Iha ninia estatutu iha 13 Juñu 2020 tuku 15:19, J.Luis Oliveira hatete katak (eis) Ministru Reforma Lejislativa Asuntu Parlamentar (MRLA), atual Ministru Prezidensia Konsellu Ministru mak sai nu’udar autor ba esbosu Kriminaliza Difamasaun.

“Naun-medigas rezultadu servisu MRLAP tinan 2 mak draft Kriminalizasaun Defamasaun? Gasta rekursu saugati,” J.Luis Oliveira hakerek iha ninia pajina facebook.

Argumentu ne’ebé Diretór Ezekutivu AJAR ne’e fó sai nu’udar erru boot ida, tanba Lei Difamasaun ne’e la’os MRLAP mak prepara, maibé Ministériu Justisa.

Relasiona ho “akuzasaun” ne’e, Ministru Prezidénsia Konsellu Ministru (MPKM) Fidelis Manuel Leite Magalhães dehan, esbosu Kriminaliza Difamasaun la'ós nia mak prodúz.

"To'o loron ida ne'e, ha'u nein haree esbosu ida, se ha'u seidauk haree, muitu menus ha'u prepara buat ruma. Ha'u nein haree, nein prepara," dehan Fidelis ba jornalista sira iha Palásiu Governu hafoin reuniaun Konsellu Ministru (KM), Kuarta (17/06).

Kona-ba Lei Difamasaun, Ministru ne’e dehan, daudauk ne’e iha hela diskusaun públiku no seidauk formal.

"Agora diskusaun ne'ebé imi haree no rona mak kaer ba sua eselénsia Primeiru Ministru (PM) Taur Matan Ruak nian katak, to'o agora governu liu-liu Konsellu Ministru (KM) seidauk iha submisaun kona-ba materia refere, maibé diskusaun agora ne'e iha públiku, maibé ida formal ne'e seidauk," dehan Fidelis

Iha fatin hanesan, Ministru Justisa (MJ) Manuel Carceres hatete, Ministériu Justisa mak sai nu’udar na’in ba esbosu Lei Difamasaun.

"Saida mak sai husi Ministériu Justisa (MJ) ne'e responsabilidade Ministru Justisa nian, loos ka lae," dehan nia.

Rate this item
(2 votes)
Last modified on Wednesday, 17 June 2020 14:29
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.