Tanba ne’e, familia no Inan rasik husi matebian husu ba Polisia Nasionál Timor-Leste (PNTL) atu investiga no prosesa kazu ne'e tuir Lei.
"Nu’udar inan sente laran ne’e moras tebes, ami familia ezije atu prosesa kazu ne’e tuir lei. Kona-ba Reitór dehan atu rezolve tuir familia ne’e ikus, tanba ami la simu ami nia oan mate de’it soe tun hanesan animál, see mak la laran moras", dehan Nia ba jornalista sira iha ninia rezidénsia Aldeia Afaka, domingu (21/06).
Familia rasik deskonfia oknum Estudante UNPAZ balun mak halo agresaun fizika hodi soe tun vitima husi andar leten ba rai kuaze metru 12.
Nia konta tuir katak, durante ne’e matebian nunka ransu no halo problema arbiru ho kualkér estudante UNPAZ.
Nune’e mós tiun husi matebian Listo de Jesus hateten, parte familia kontaktu ona Reitór UNPAZ, Adolmando Amaral atu responsabiliza aktu violensia no krime ne’e.
"Ami kontaktu ona ho lider masimu UNPAZ nian atu responsabiliza aktu ne’e, tanba ko’alia kona-ba rezolve tuir dalan familia ne’e ikus, tanba kazu krime ne’e tenki rezolve uluk, see mak halo krime tenki kaer no prosesa tuir lei", nia dehan.
Familia mós rezeita deklarasaun Reitór UNPAZ kona-ba vitima no nia kolega na'in tolu mak halo asaltu ba estudante sira iha UNPAZ ne’e laloos, tanba bazeia ba kronolojia ne’ebé familia rekolla katak, estudante UNPAZ mak konvida vitima ho nia kolega na’in tolu hodi sira hemu tua hamutuk iha fatin akontesimentu.
Dadaun ne’e mate isin sei rai hela iha Mortuáriu Ospitál Nasionál Guido Valadares hodi hala’o prosesu autopsia foin bele entrega ba familia.
Antes ne’e, Reitór UNPAZ, Adolmando Amaral klarifika kronolojia kazu ne’e katak, iha oknum juventude na’in haat (4) ne’ebé hela besik área UNPAZ halo asaltu tama ba areadores UNPAZ, hafoin rezulta Henrique mate fatin.
Reitor ne'e dehan, parte UNPAZ entrega ona kazu ne’e ba Komandu PNTL hodi halo investigasaun kle’an no prontu rezolve kazu tuir dalan familia no tuir lei.
"Ita hein rezultadu investigasaun hotu, Universidade da Paz bele rezolve problema ho familia tuir dalan familia nian ou dalan legál", nia hateten.
Reitor UNPAZ Adolmando mós rezeita informasaun kona-ba estudante sira hemu tua maka provoka situasaun, nu’udar informasaun ne’ebé laloos no nia parte mós rezeita la’ós estudante sira maka oho matebian.
Entertantu, Matebian Hendrigue Maia Soares hanesan oan primeiru husi inan Domingas Soares no aman Domingos Maia nu’udar membru polisia Unidade Batalliaun Orden Públiku (BOP) husi Munisipiu Ermera, durante ne’e hela iha Aldeia Afaka, Suku Manleu, Postu Don Aleixo, Munisipiu Dili.
To’o notisia ne’e publika Tempo Timor.com tenta konfirma ba Komandante Polisia Munisipiu Dili, Superintendente Xefe Armando Monteiro, maibe seidauk bele fó esplikasaun, tanba sei hein rezultadu investigasaun husi ekipa Polisia Eskuadra Aimutin.