Portavós PSHT, Abilio Mesquita 'Mausoko' dehan, atu halo reativa ba arte marsial tolu ne’ebé taka hanesan KORK, IKS, no PSHT maka Governu presiza kria lei ida ne’ebé rigor hodi bele regula.

“Bainhira reativa fila-fali presiza lei mak garantia, tanba ita hotu iha Estadu direitu demokrátiku ne’e lei mak garantia", dehan nia, iha Palásiu Prezidensiál Bairru-Pite, Tersa (19/3).

Nia dehan, ema ida halo sala iha responsabilidade ba hataan iha Tribunál bainhira kumpri ona oras 72 iha sela. Bainhira tuir ona primeira interogatóriu mak sei hatene ema ne’e loos ka sala.

Nune’e, eis-Prezidente IKS, Silvestre Xavier Sufa hateten, prontu atu koopera no hadia lei internal nian. Bainhira Governu presiza sei koopera masimu. Tanba atu reativa arte marsial ruma presiza duni iha lei ne’ebé rigorozu inklui prienxe rekizitu sira.

“Ami na’in hira ne’e (IKS, PSHT, KORK) prontu atu submete ba buat ne’ebé Governu atu halo, tanba ita hanesan sidadaun di’ak presiza koopera hodi hadi'a ita-nia nasaun liuhusi pás no estabilidade”, tenik nia.

Entretantu, Prezidente Repúblika, Francisco Guterres Lú Olo mós husu bainhira reativa ba arte marsial sira presiza kria estabilidade no pás iha Timor-Leste.

Nune’e, arte marsial sira ne’e sai hanesan desportu ida para bele lori nasaun nia naran ba kompete iha nasaun seluk liuhusi kompetisaun internasional no nasional.