Adjuntu Komisáriu KAK ba Prevensaun no Sensibilizasaun, Luis Oliveira Sampaio informa, hosi rezultadu monitorizasaun ne'ebé sira ekipa halo ba distribuisaun subsídiu Covid-19 ba suku hotu iha territóriu nasionál, konsege identifika funsionáriu públiku hamutuk ema nain 326 mak sai benefisiáriu.

“Sim, hosi dadus rezultadu monitorizsaun ne'ebé ami halo, ami hetan meizumenus 326 kazu ne'ebé identifikadu hanesan funsionáriu públiku no bainhira ami halo atuasaun, ami iha sorte diak atu trava kedas, tanba identifika sira koordena ho autoridade lokál hodi kombina ho ami”, dehan Komisáriu Adjundu KAK, Luis Oliveira Sampaio ba www.tempotimor.com iha nia kna'ar fatin Pantai-Kelapa, kinta (13/08).

Nia hatete, hafoin identifikasaun, sira halo kedas aviza no sira balu ho voluntáriamente ba devolve fali osan ne'ebé simu durante periodu pagamentu iha suku sira.

“Balu iha prosesu nia laran sira kontaktu KAK besik ema nain 15, no balu mai rasik, ho sira nia deklarasaun iha karta, balu halo deklarasaun iha média liuhosi ami nia amail”, informa nia.

Nia akresenta, kona-ba totál akumulasaun dadus ba sira ne'ebé rejistu dobru, sira ne'ebé deskomfia fen-laen rejístu keta-ketak, ho kazu hamutuk 1977, no hosi totál ida ne'e, KAK konsege trava osan ne'ebé atu sai, kuaze U$. 385.400 mill amérikanu.

Nia dehan, ba funsionáriu sira ne'ebé simu liu tiha ona, KAK sei buka estratéjia oioin hodi enkojara sira atu koolabora ho estadu, tenke kontribui hadi'a jestaun estadu nian hodi partisipa voluntariámente devolve fali osan.

“Mais funsionáriu públiku sira ne'e fásil tanba sira hotu nia identidade ne'e iha ministériu finansas, sira labele dehan lae, tanba ne'e osan estadu nian sira laiha direitu, sé sira la kumpri, kontra lei”, hatete nia.

Nia afirma, funsionáriu públiku ne'ebé la obedese ba desizaun estadu nian, bele hetan sansaun lubuk ida, indixiplinar bele prosesu nian, no bele dehan kríme pekulatu, tanba sira simu osan ne'ebé tuir lei, entaun tenke prosesa.

Maske nune'e nia dehan, situasaun mosu, tanba dala-ruma ema balu hakarak duni atu dezafia estadu, maibé balu mós tanba ita nia sistema mak seidauk di'ak hodi la konsege deteta.

“Ita rekoñese katak iha sirkunstansia barak maka influensia prosesu nee iha kontextu katak ministériu sira tutela ne'e, iha momenta ne'ebá iha presaun nia okos, tanba ema ezíje bainhira mak osan ne'e sai, tanba iha liur ema sofre ema iha problema kona-ba ai-han”, dehan nia.

Ba oin KAK sei koordena ho ministériu ida-idak nia tezoureira atu identifika sira nia funsionáriu atu ko'a de'it sira nia osan, hodi devolve hikas osan ne'ebé funsioná públiku sira simu ona.

Entretantu iha rezultadu monitorizasaun, KAK aprezenta relatóriu ba MAE, MSSI, nomós kópia ida ba PPN no PM hanesan xefi governu atu konsidera rezultadu ne'ebé sira hetan.