Tuir Diretór Ezekutivu FONGTIL, Daniel Santos katak, asaun Parlamentu Nasionál nian, hodi hasai deputadu Kalohan nia imunidade ne’e, di’ak tebes, tanbá ne'e, tenke apoiu.
“Aktu ne’ebé PN halo ne’e di’ak loos, ita tenke apoiu para promove buat ida boa governasaun nian mak ne’e,” dehan Diretór Ezekutivu FONGTIL, Daniel Santos do Carmo ba jornalista sira, iha Palásiu Prezidensiál, hafoin remata akompaña reuniaun Konsellu Estadu nian, Segunda (31/08).
Diretór ne’e mós dehan, kualkér se de’it mak komete krime ka erru ruma, tenke ba hatán iha justisa.
“O atu deputadu ka, o atu ministru ka se se de’it halo sala, mak tribunál halo notifikasaun mai, instituisaun hanesan PN tenke hasai nia imunidade para nia ba hatán, tanba nia hanesan sidadaun baibain ida, tanba nia komete krime ne’e, la'ós reprezenta PN, ne’ebé ne'e la'ós señor deputadu mak ba, maibé pesoál António mak ba, tanba ne’e hasai ona nia imunidade ne’e, signifika nia ba individu,” dehan Daniel.
Daniel akresenta, bainhira imunidade hasai ona, mak ba tribunál bele dehan nia (Kalohan) ne’e loos ka sala, ne’e kompeténsia tribunál nian. Tanba ne’e, PN ka instituisaun ne’ebé de’it mak deskonfia ema ruma halo sala, hasai nia imunidade, hodi ba hatán iha tribunál.
Entretantu imunidade deputadu Kalohan nian, hasai ona, iha Eis-Prezidente Parlamentu Nasionál, Arão Noé de Jesus da Costa Amaral nia tempu, maibé TR husu hikas, nune’e Komisaun A PN haruka hikas dokumentus tuan ne’e ba PN, hodi enkamiña fali ba TR, tanba buat ne’ebé TR husu, mak komisaun A hasai tiha ona.
Alende ne’e, tuir relatóriu pareser Komisaun A nian, ne’ebé antes ne'e, iha tinan 2019, aprezenta ba PN, iha loron 15/10/2019, katak atuál deputadu ne’e, hetan akuzasaun, husi tribunál, tanba hanesan arguidu ba kazu partisipasaun ekonómika, iha tinan 2014. Nune’e tribunál nia notifikasaun ba PN, iha loron 13 Jullu 2019, ho númeru NUK0075/17PGGCC, tanbá ne'e, iha momentu ne’ebá, deputadu PN hasai deputadu Kalohan nia imunidade, ho votus a favór 27, kontra 13 no abstensaun 2.