Prokuradór Jerál Repúblika (PJR) la konkorda ho desizaun Tribunal Distrital Dili (TDD) ne’ebé fó medida koasaun Termu Indentidade Rezidensia (TIR) ba arguidu ne’ebé deskonfia importa material droga.

“Agora prokurador titular halo hela análiza ba desizaun ne’e para bele hetene médida koasaun ne’e merese duni ka lae”, tenik Prokuradór Jerál Repúblika, José da Costa Ximenes, iha Palásiu Prezidensiál Bairru-Pité, Kuarta (10/4).

Nia salienta droga ne’ebé arguidu APAX lori tama mai Timor-Leste ne’e hamutuk kontentór sia ne’ebé nakonu ho material báziku hamutuk kilograma 250 no 160 grama kokaina.

“Hanesan prokuradór Jerál Repúblika la aseita mas ita respeita desizaun tribunal nian. Ita iha mekanizmu, bele la konkorda, bele halo rekursu”, tenik nia.

Prokuradór ne’e mós lakohi bainhira sidadaun estranjeira hetan desizaun aprezentasaun periódika ka probisaun aujensia. Desizaun ne’e ba timoroan ne’e natoon, maibé ida ne’e la'os sidadaun estranjeiru.