"Ita tenke prepara aan hodi hasoru sira ka dezafiu sira ne'ebé hanehan ita, tanba kriminalidade ne'ebé boot liu no atinje sosiedade sira mak sei sai organizadu liután, poderozu liután no disteritorializadu ba bei-beik," dehan Prokuradór Jerál da Repúblika (PJR) José da Costa Ximenes liuhusi nia diskursu ba aniversáriu Ministériu Públiku (MP) nian ba dala 20 iha Aitarak-laran, Dili, Sesta (9/10).
PJR afirma, krime sira ne'ebé sei sai burak liután kuandu TL la prepara aan mak hanesan korupsaun no seluk tan.
"Kazu korupsaun, lavazem dineiru, tráfiku ba droga, tráfiku umanu, kontra bandu, falsifikasaun dokumentu sira no seluk tan."
Kriminalidade sira ne'e organiza aan, la'ós garante objetivu krimnozu sira nian hodi hetan benefísiu ilísitu nian, maibé oinsa mak sira bele skapa ka halai ses husi justisa kriminál.
"Estadu ne'ebé frazíl liu ho instituisaun sira ne'ebé ninia estrutura frazíl liu, mak sei sai alvu loloos ba kriminozu sira. Bainhira ita la prepara didi'ak hodi reziste kriminalidade sira ne'e, ita-nia futuru bele sai komprometidu, tanba ne'e laiha dalan seluk, ita tenke prepara aan hodi kombate kriminalidade sira ne'e," katak nia.
Nia mós afirma, kombate kriminalidade sira ne'ebé infiltra iha poder para atu na'uk rekursu públiku sirq, ne'ebé tuir ita-nia instituisaun públiku ninia ezisténsia, liu-liu hakle'an dezigualidade sosiál.
Tanba ne'e ko'alia kona-ba re-estrutura orgánika Ministériu Públiku (MP) nian, para bele kumpri didi'ak ninia funsaun.
PUBLISIDADE