Prezidente Tribunál Rekursu, Deolindo dos Santos seida’uk bele halo komentáriu ba matéria méritu husi prosesu ne’e rasik. Maibe, se desizaun iha primeira instansia maka Ministériu Públiku intende katak desizaun la loos bele halo rekursu ba Tribunál Rekursu.

Maski nune'e, nia deklara Tribunál Rekursu to’o ohin ne’e, seida’uk iha rekursu ruma mak tama kona-ba prosesu ida ne’e rasik.

Tuir Deolindo, preokupasaun públiku ne’e normal tanba buat ne’e boot tebtebes. Ne’ebé sempre hamosu preokupasaun tanba afeta ba pais tomak, liuliu ba saúde públiku.

"Tanba ne’e atu haree buat ne’e kle’an ho di’ak liután só bainhira juis sira haree iha prosesu nia laran, mas ida ne’e depende andamentu prosesu ne’ebé sei la’o iha tempu tuir mai”, tenik nia, iha Palásiu Prezidensiál Bairru-Pité, Segunda (15/4).

Prezidente tribunal rekursu mós lakohi pronunsia antesipadamente kona-ba kazu ne’e nia méritu, enkuantu kazu ne’e seida’uk to’o iha prezidente nia-liman.