Tuir Prokuradór Jerál Repúblika (PJR), José da Costa Ximenes katak, pena prizaun tinan lima ba arguidu lori droga ne'e ki'ik liu.

"Iha semana kotuk, TDD hasai ona desizaun pena prizaun tinan lima ba arguidu ne'ebé involve iha kazu droga, ne'ebé ita kaptura iha 14 Janeiru 2020, maibé pena ida ne'e kmaan teb-tebes ba droga ho kilgrama 3,253. Entaun saida mak ami halo, ami halo rekursu ne'ebé hatama tiha ona tribunál distritál Dili para kontinua ba Tribunál Rekursu (TR)," dehan PJR José, iha Palásiu Prezidensiál Bairro-Pite, Díli, segunda (19/10).

Ministériu Públiku (MP) preokupa ho desizaun ne'ebé TDD foti ne'e, tanbá juiz sira ne'ebé prezide kazu ida ne'e, foin tama iha kareira ka seidauk to'o tinan ida.

"Juiz sira ne'ebé seidauk iha esperiénsia, di'ak liu kaer kazu violénsia doméstika sira, ha'u la'ós dehan sira laiha kapasidade, maibé esperiénsia seidauk iha," dehan PJR.

Nia hatutan, se kazu droga uluk iha kilograma ida de'it, maibé nia pena to'o tinan 10, tanba saida mak iha kilograma 3.253 ba tinan lima?.

"Droga ida kg 3.253 ne'e droga puru, sabu-sabu, bele multiplika ba valór osan millaun $3, entaun pena sira hanesan ne'e loke tan dalan para droga atu tama nafatin," nia tenik.

José Ximenes mós repete hikas mensajen ne'ebé lansa iha destroisaun ba kazu droga tonelada 160 ne'e katak, sistema kontrolu, iha TL ne'ebé fraku ka frazíl, problema iha kuadru legál no pena kiik ba kazu droga, tanba ne'e tenke haree ba impaktu saida mak sei simu, bainhira desizaun ne'e sai ona, tanbá tinan-tinan droga sempre tama, tanba ne'e, tenke iha responsabilidade.

Entretantu arguidu Casmiro Mateus Batelho ne'e trasporta droga hosi Nigéria mai TL, liuhosi Aeroportu Internasionál Nicolau Lobato Díli, iha loron 30 fulan dezembru tinan 2019, nune'e parte seguransa halo kapturasaun ba arguidu ne'e, iha loron 14 fulan Janeiru 2020, iha nia servisu fatin Timor Plaza Díli.(*)