Tuir Prokuradór Jerál da Repúblika (PJR) José da Costa Ximenes katak, desizaun refere kaman liu, tanba juis ne'ebé kaer kazu ne'e mesak seidauk iha esperiénsia.
"Juiz sira ne'ebé seidauk iha esperiénsia, di'ak liu kaer kazu violénsia doméstika sira, ha'u la'ós dehan sira laiha kapasidade, maibé esperiénsia seidauk iha, ne'e kestaun jestaun tribunál nian," dehan PJR.
Nia mós dehan, se kazu uluk droga iha kilograma ida de'it nia pena to'o tinan 10, tanba saida mak iha kilograma 3.253 ba tinan lima?.
"Droga ida kg 3.253 ne'e droga puru, sabu-sabu, bele multiplika ba valor osan millaun $3, entaun pena sira hanesan ne'e loke tan dalan para droga atu tama nafatin," nia tenik.
Hatán ba kestaun ne'e, Prezidente Tribunál Rekursu (PTR) Deolindo dos Santos dehan, se la konkorda desizaun tribunál nian, dalan mak halo rekursu.
"Bainhira iha parte ida mak la konkorda desizaun, iha direitu tomak ne'ebé lei prosesu penál admite, nia bele rekora ba tribunál rekursu. Depoia mak TR haree iha razaun ka laiha razaun depois mak TR bele hatete," dehan PTR Deolindo iha Palásiu Prezidensiál bairru-pite, Tersa (20/10).
Lider judisiál ne'e mós afirma, pena ne'ebé tribunál distritál Dili fó ne'e adekuadu ka lae, ne'e liuhusi prosesu rekursu mak foin klaru, maibé labele emite hanoin iha públiku, di'ak liu mak husi dalan legál.
Entretantu arguidu Casmiro Mateus Batelho trasporta groga husi Nigeria mai Timor-Leste liuhusi Aeroportu Internasionál Nicolau Lobato Dili iha loron 30 Dezembru 2019, nune'e parte seguransa halo kapturasaun ba arguidu iha nia servisu fatin Timor Plaza iha loron 14 Janeiru 2020.
Alende ne'e, kazu ne'ebé parte kompetente la satisfaz hodi halo rekursu ne'e hela 17 mak sei iha tribunál rekursu, maske iha 2018, iha kazu rekursu nian ne'e iha 200 reain, maibé dadun ne'e hela 17 ne'ebé iha kinta semana ne'e balun desizaun sai tan ona.(*)