Print this page

Luis Roberto sei Keixa Deputadu “Bandidu” CNRT

By October 27, 2020 7585
Vise Prezidente Parlamentu Nasionál (Vise PPN) Luis Roberto ko'alia hela ho jornalista sira iha resintu Parlamentu Nasionál (PN). Vise Prezidente Parlamentu Nasionál (Vise PPN) Luis Roberto ko'alia hela ho jornalista sira iha resintu Parlamentu Nasionál (PN). Foto Tempo Timor

Tempotimor (Dili)- Vise Prezidente Parlamentu Nasionál (PN) Luís Roberto sei hato'o keixa ba Ministériu Públiku hodi kondena deputadu no deputada “bandidu-bandida” husi bankada CNRT.

Luis Roberto deklara asuntu ne’e liuhusi plenária iha Tersa (27/10), relasiona ho akuzasaun ka provokasaun sira ne'ebé lansa husi deputadu bankada CNRT Jose Pereira, iha loron antes.

Deputadu husi partidu KHUNTO ne’e lamenta tebes tanba hanesan vise prezidente PN tuir loloos la merese atu hetan ameasa husi deputadu sira, pior liu maka deputadu sira sadik atu tuku malu ho Luis Roberto.

"Ha’u halo ona reklamasaun ida ba Prezidente Parlamentu Nasional hodi bele baixa ba komisaun étika PN nian no ha’u prontu atu kontinua ba Ministeriu Públiku atu bele bolu deputadu-deputada ne'ebe ninia halohalok hanesan deputadu bandidu sira," nia hateten liuhusi plenária.

Deputadu ne’e mós sente triste tanba tuir nia haree katak, oras ne'e daudaun deputadu sira husi CNRT la'ós ona ko’alia politika hanesan deputadu, maibé sira ko’alia hanesan stres politika ne'ebé nakonu ho interese partidu nian.

Nia dehan, tuir loloos deputadu sira la merese atu halo insultu oioin, tanba povu fó fiar sai deputadu no deputada, atu hatudu matenek, nune'e bele reprezenta povu ho loloos.

"sira dehan katak ha’u beik ten, lekirauk, depois iha balun ne'ebe mak husu atu tuku malu ho ha’u, hakarak atu sparing ho hau. Ida ne'e mak ha’u konsidera órgaun ida ne'e hanesan laiha dignidade. Deputadu-deputada ne'ebé hasai liafuan ne'e konsidera hanesan bandalizmu," nia dehan.

Nia husu deputadu sira tenke uza Parlamentu Nasionál hodi reprezenta duni povu, ko’alia mos tenke hanesan deputadu no deputada, bazeia ba mata dalan no rejimentu ne'ebé mak prevee ona.

Hataan ba kestaun ne'e, deputada bankada CNRT Maria Gorumali Bareto husu publiku lalika fiar deputadu KHUNTO ne'ebe tenta atu bosok tan.

Tuir nia, problema ne'ebe mosu horiseik ne'e tanba deputadu Luis Roberto hasai liafuan manu kokotek hodi akuza uluk deputada opozisaun CNRT.

"Liafuan kokotek ne'e signifika animal, tanba iha plenaria ida ne'e laiha animal ida mak mai tur fali iha ne'e, ne'ebe deputadu ne'ebe koalia liafuan manu kokotek ne'e laiha etika, mal edukadu," Deputada ne'e lamenta.

Rate this item
(2 votes)
Last modified on Tuesday, 27 October 2020 22:40
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items