Tilman defende ninia kliente to’o hakilar iha Tribunál Distritát Dili (TDD) hodi fó sala ba média tanba konsidera ninia kliente hetan detensaun tanba média mak kontribui iha publikasaun.
Atu dehan katak, julgamentu primeiru interrogatóriu ba arguidu Prezidenti ANC ne'e remata ho barullu iha área TDD, maski seidauk iha rezultadu.
Tuir observasaun www.tempotimor.com nota katak, TDD hahú julgamentu ba arguidu Prezidenti ANC iha oras 18:00 otl to’o remata oras 20 : 20 otl ne’ebé akompñaa husi kaben, família inklui kolega servisu ne'ebé hein iha aredores TDD nian.
Hafoin julgamentu, arguidu JOF hakat sai husi sala julgamentu no akompña husi advogadu privadu Manuel Tilman ne'ebé ko’alia ho lian makaas atu labele halo entervista ho Jornalista sira.
Tilman konsidera Média mak sai fatór ne'ebé lori arguidu JOF hetan buska no kapturasaun husi PNTL Servisu Investigasaun Kriminal (SIK) relasiona ho atividade internet ilegal iha Timor-Leste.
"Ha’u dehan ba imi, kuidadu lalika ko’alia tun sa’e, kona-ba intervista iha GMN tv ne'e mak hodi hakoi nia ne'e," Tilman dehan iha TDD, Sábadu (28/11).
Tilman mós ko’alia makaas hodi fó esperansa ba família husi JOF katak, kliente ne’e sei la tama kadeia.
"Agora ha’u hakarak hateten de’it ba imi, buatamak na’in rua iha tiha ona kadeia, ha’u lakohi atu hau nia kliente ne’e ba kadeia," Tilman dehan.
Nune'e, Familia husi arguidu JOF rasik balun halai ba hakuak advogadu Tilman hodi tau fiar tomak ba advogadu ne’e durante prosesu julgamentu.
Arguidu JOF rasik hetan korajem no hakuak husi familia no kolega sira antes fahe malu iha aredores TDD.
"Pai, ida ne'e mak ha’u hakarak," arguidu nia kaben Fen hateten ba Tilman.
Julgamentu ba Prezidenti ANC rasik adia ba aban Domingu (29/11) ne'ebé sei hahú iha TDD Oras 14:00 otl.
Prosesu julgamentu ne’e prezide husi juiza, Ercila da Costa, Ministéiru Públiku reprezenta hosi prokuradór Matias Soares no arguidu sira hetan asisténsia legál hosi advogadu privadu Manuel Tilman. (*)
PUBLISIDADE