Maske nune'e advogadu privadu ne'ebe defende arguidu TVB, Pedro Aparício hatete mesmu nia kliente liberta ona husi prizaun preventiva maibé prosesu investigasaun sei la'o hela, tanba ne'e Ministeiru Publiku (MP) halo inkéritu mak foin hatene rezultadu katak hahalok arguidu ne'e komete krime ka lae.
Maibé, Pedro hatutan, bainhira prosesu inkéritu remata, laiha prova katak nia kliente komete krime entaun bele halo arkivamentu (taka) nune'e iha posibilidade tuir lei iha kódigu sivíl ko'alia kona-ba direitu indemnizasaun durante prosesu tomak tanba halo limitasaun ba nia liberdade no hatama iha prizaun.
"Agora prosesu ida-ne'e karik ikus mai dehan laiha prova entaun Kompaña Telemor sei hanoin fali, deside karik (apakah) lori ba Tribunál sívil hodi husi indemnizasaun ka ou dehan fó perdaun, ida-ne'e depende Telemor iha futuru mai, maibé Lei prevee katak ema ne'ebé mak limite nia liberdade durante prosesu inkéritu ou husi desizaun ida, ikus mai iha direitu husu indemnizasaun ba iha estadu para tenke selu," dehan Pedro ba www.tempotimor.com iha TDD Dili, tersa (09/02).
Antes ne'e, Iha loron 29 Janeiru 2021, Tribunal Rekursu (TR) liuhosi akordaun altera medida koasaun hodi deside liberta Ceo Telemor TVB bainhira parte Defeza ka advogadu privadu hato'o rekursu ba TR relasiona ho desizaun TDD hodi aplika Prizaun preventiva ba arguidu.
Nune'e daudaun ne'e arguidu kontinua halo aktividade iha nia kna'ar-fatin maibé apreensaun pasaporte hodi arguidu labele halo viajen ba estranjeiru no kada semana sei aprezenta-aan iha Polísia.
Entertantu kazu Internet ilegál sai bombástika iha públiku bainhira Polísia Sentru Investigasaun Kriminál (PNSIK) ezekuta mandadu Tribunal buska no detensaun ba Kompañia ISP sira ne'ebé deskonfia halo konekasaun internet ilegalmente iha Timor-Leste inklui Operador Telemor rasik ne'ebé akontese iha Fim do ano 2020.(*)