"Ohin investigadór sira husi (KAK), ezekuta mandadu husi Tribunál Distritál Dili nian relasiona ho kazu balun ne'ebé agora daudaun iha hela prosesu investigasaun nia laran," Pontu Vokál ba kazu refere, Euclides Vidál Martins informa ba jornalista sira, iha Ai-Mutin, hafoin remata investigasaun ba Diretora Kompañia Mishra Lda, kinta (18/02).

Nia dehan, prosesu buska ne'e hala'o, tanba iha nesesidade atu foti dokomentu sira balun hodi sai hanesan evidénsia, tanba kompañia ida-ne'e mak manán kontratu ida husi projetu iha governu.

"Tanba ida-ne'e mak ohin ami deside halo buska no apreensaun bazeia ba iha mandadu husi Tribunal Distritál Dili nia," tenik nia.

Nia informa, dokumentu ne'ebé sira foti mak hanesan surat-kontratu, invoice nomós pedidu kontratu ho dokumentu seluk ne'ebé iha relasiona ho kazu ne'ebé kompañia ne'e komete.

"Ami foti no lori ba iha ami-nia fatin sei halo análize ba dokumentu sira-ne'e hotu, inklui mós dokumentu eletróniku balu hanesan komputadór sira, atu nune'e ba iha ne'ebá sei halo teste hotu, depois rezultadu fó ba prokurador sira," dehan na.

Konteúdu husi kazu ne'ebé kompañia komete, nia parte labele fó-sai tanba sei segredu justisa, maibé iha kazu balun ne'ebé akontese antes iha tinan 2020 liubá, ligadu ho kazu kontratu ne'ebé nia manán depois investiga deteta katak, iha buat balun ne'ebé mak la asina ho lei, tanba ne'e mak deside hodi mai halo buska apreensaun fatin ida ne'e.

"Ohin ami mai halo buska aprensaun, lori dokumentu balun no mós sasán eletróniku sira balun, inklui ho karreta ida, no lori hotu diretora ba kompania refere ba hotu (KAK), hodi halo investigasaun," tenik nia.

Nia dehan, karik prosesu identifikasaun mak karreta sira-ne'e iha relasaun bele foti hotu, enkuantu na'in ba kompañia ne'e depende ba prosesu identifikasaun mak iha indísiu ne'e forte no suporta ho evidénsia sira-ne'e forte halo kedas detensaun ba na'in sira-ne'e.(*)