Prezidente AIRDV, José Dias Guterres "Moi-Mali" hateten, daudaun ne'e identifika kazu hamutuk 500 ne'ebé durante ne'e manán osan estadu liuhusi falsifikasaun dokumentu veteranu nian.

Ba kestaun ne'e, ohin AIRDV lidera husi Jose Dias Guteres "Moi-Mali" ho nia komitiva halo audiénsia ho Prezidente Parlamentu Nasionál, DeputadubAniceto Longuinhos Guterres Lopes, hodi ko'alia kona-ba oinsá atu kontinua rekolla dadus hirak ne'e.

"Ohin, mai hasoru malu ho prezidente PN hodi ko'alia kona-ba veteranu sira-ne'ebé falsifikadu dokumentu. Enfelismente ami rekolla ona, ema ne'e hamutuk atus-lima ba ona iha Ministériu Públiku hodi hala'o ona prosesu interrogatóriu, agora sira atu ba ona tribunál," dehan nia iha Parlamentu Nasionál, sesta (19/2)

Nia haktuir, inisiativa asosiasaun hodi rekola dadus veteranus falsu ne'e, tanba hetan apoiu husi orgaun estadu hat, mak hanesan Prezidente Repúblika, Primeiru Ministru, Prezidente Tribunál Rekursu no Prezidente Parlamentu Nasionál.

Kona-ba kazu veteranus falsu hamutuk 500, ne'e nia haktuir, ne'e evolve husi Munisipiu 12 no RAEOA, maibe iha numeru falsifikasaun ne'e barak liu mak iha Same.

"Osan sira simu tiha ona, estadu gasta osan, sira-ne'e iha leet de'it, agora sira-nia kulpa halo oinsá ne'e tribunál mak hatene, ha'u labele hatene," dehan nia.

"Identifika falsu tanba familiarislzmu, partidarizmu, kolegarizmu, but ismu-ismu ne'e mak lori sai to'o veteranu falsu iha Timor laran ne'e, halo korrupsaun boot liu mak veteranu," hatete nia.

Nia haktuir, kada tinan estadu gasta osan milaun ba milaun, maibé la'os selu de'it maka veteranu falsifikadu sira, duke ba selu ema sira-ne'ebé veteranu asli. (*)