"Triste la'os tanba laiha esperansa, triste tanba sira lakon ona momentu ne'ebé bele prienxe ho jornada ho valor, maibé tenke limite sira-nia liberdade hodi sira responsabliza ba sira-nia aktu ne'ebé sira rasik halo", tenik nia, bainhira hamutuk ho espoza Prezidente Repúblika hala'o vizita ba prizoneiru sira iha Prizaun Bekora, Tersa (28/05).
Nia hatutan, naski nune'e nuudar sidadaun tenke hakruuk ba lei no konsekuensia sira ne'e, pena sira ne'e tuir aktu ne'ebé sira halo.
"Fatin ne'e halo la fó limitasaun ba imi. Imi iha liberdade para hetan formasun no iha kriatividade barak inklui fatin ne'e mós hanesan fatin reflexaun para bele halo ezame konxiensia ba sira nia-aan, inklui responsabliza ba sira nia aktu sira ne'e. Bainhira sira sai husi ne'e bele sai ema foun ho hanoin, vizaun no paradigma foun para bele prienxe kualidade moris ho diak liután", tenik Dadi.
Nune'e, nia mós apela ba juventude sira iha Timor laran tomak atu hadook-aan husi krime atu bele sai jerasaun ne'ebé tenke orgullu hanesan timoroan ho vizaun diak ba nasaun.