TL Fatin Tranzitu Droga, Migrasaun TL Fraku, Indonezia Kaer Kazal Timor-oan Lori Droga Featured

Droga sira mak hakat parte Migrasaun TL iha Batu Gade ne'ebe kaptura husi autoridade Indozisa iha Belu, Kuarta (29/05) Droga sira mak hakat parte Migrasaun TL iha Batu Gade ne'ebe kaptura husi autoridade Indozisa iha Belu, Kuarta (29/05) Foto Especial

Tempotimor (Batu Gade) - Autoridade seguransa Indonezia kaptura Timor-oan na'in rua ne’ebé nu'udar feen ho laen iha area Belu, Nusa Tenggara Timur (NTT) iha Kuarta (29/05). Husi kazal ne'e nia liman, autoridade sira prende droga ho tipu ekstasi besik grama rihun rua.

Tuir informasaun ne'ebé tempotimor hetan, Migrasaun Indonezia iha Mota-ain kaptura sidadaun Timor Leste ho inisial JSP ho idade tinan 34 ho nia feen AS ho idade tinan 31 iha tuku 11.57 oras Indonezia iha aldeia Mota-ain, Suku Silawan, Postu Tastim, Munisipiu Belu, NTT hafoin autoridade Timor Leste liu-liu Imigrasaun nasaun ne'e falla deteta droga ne'ebe suspeitu sira ne'e lori tama ba nasaun vizinu Indonezia.

Husi kazal ne'e nia liman autoridade Indonezia sira prende droga ho tipu ekstasi ho kuantidade barak ne'ebé subar iha makina imprime ida nia laran.

“Sidadaun Timor Leste na’in rua ne’e hetan kapturasaun tanba bainhira halo inspesaun ho makina X-ray iha postu migrasaun Indonezia, Timor-oan na’in rua ne’e nia dos ne’ebé tau makina imprime iha laran la konsege pasa inspesaun. Bainhira parte migrasaun loke identifika pílula (pil) ekstasi falun lima ne’ebé subar iha makina imprime nia laran,” informa fonte ida ba tempotimor, Kinta (30/05).

Identifikasaun husi migrasaun Indonezia ne’e la’os de’it hafoer imajen Timor Leste maibé lori ba pergunta kapasidade migrasaun Timor Leste hodi identifika sasan illegal sira, sa tan sidadaun na’in rua ne’e tama ba Indonezia liu husi dalan legal.

"Iha posbilidade ruma la loos on a iha ita nia autoridade sira liu-liu alfandegas ho Migrasaun ne'ebe hala'o kna'ar iha Batugade. Lala'ok ida ne'e hamo'e tebes Timor Leste ita nia vizinu ninia matan," dehan responsavel seguransa ida ne'ebe husu labele publika ninia naran.

Fila hikas ba Belu, hafoin migrasaun identifika, iha tuku 14.00 oras Indonezia, Unidade Polisia Droga Belu no migrasaun Atambua lori sidadaun Timor Leste na’in rua ne’e ba edifisiu migrasaun Atambua hodi halo prosesu tuir mai.

Hafoin inspesaun iha Migrasaun Atambua droga ne’ebé sira lori ho tipu Ekstasi falun lima. Falun dahuluk pílula kór matak iha hamutuk 972, iha falun daruak iha pílula kór azul 988, falun datoluk iha pílula kór azul 969, falun dahaat iha pílula kór matak 977, no ikus liu pílula kór kastaña (coklat) 968.

“Pílula kór matak ho grama 724, kór azul ho grama 791, no kór kastaña ho grama 346. Total iha grama 1.861,” informa fonte ida.

Indonezia nia lei kona ba Droga todan tebes wainhira ema suspeitu ruma provadu sala mak hetan kastigu todan. Arguido barak maka hetan tiru mate husi autoridade Indonezia nian. 

Rate this item
(3 votes)
Last modified on Thursday, 30 May 2019 17:33
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com