Komandante Jeral PNTL, Komisariu Faustino da Costa informa, durante fulan rua nia laran, hahú husi fulan Maiu to'o Juñu 2019, mosu kazu krime 408.
Husi númeru kazu ne'e, kazu krime entre grupu artemarsiais okupa númeru aas liu kompara ho kazu sira seluk.
"Ohin enkontru ho Prezidente Repúblika informa situasaun seguransa teritóriu nasional la'o ho di'ak so ke iha disturbu balun liu-liu iha kapital Dili, insidente sira ne'e mak sai tiha hanesan preokupasaun, katak insidente boot liu husi fulan Maiu mai to'o Juñu loron hirak ne'e, no asultu ne'e akontese ikus-ikus ne'e bele dehan mai husi eis (grupu) artemarisias sira", informa Komisariu Faustino ba jornalista sira hafoin enkontru ho Prezidente Repúblika Francisco Guterres Lu Olo iha palásiu prezidensial Bairro-pite, Kinta (14/06/2019).
Kazu hirak ne'ebé PNTL rejistu mak hanesan kazu insidentes, violénsia doméstika, ofensas integridade simples inklui soe bebe iha Dili no mós iha Kovalima.
Ho númeru krime husi grupu artemarsiais ne'ebé sa'e maka'as, Komisariu apela atu membru grupu artemarsiais ne'ebé governu bandu liu husi dekretu lei nú. 5/2017 atu hatudu hahalok di'ak no disiplina.
Ba grupu artemarsiais ne'ebé la hetan bandu, Komisariu husu atu labele komete kazu krime atu nune'e governu labele bandu fali sira hala'o sira-nia atividade.
"Hatudu atetude di'ak de'it, disiplina, ida ne'e lei nú. 5/2017 la bandu ne'e, labele envolve aan iha (krime) laran par ikus mai ita-boot sira labele hetan fali ita-boot sira-nia atividade".
Entretantu PR Lu Olo rekoñese iha dezafiu boot ba situasaun sira ne'e, maibé husu nafatin ba PNTL atu halo atuasaun, inklui halo koordenasaun ho F-FDTL hodi garate situasaun.