Embaixadór Repúblika Indonezia iha Timor Leste Sahat Sitorus deklara kestaun ne'e bainhira partisipa iha lansamentu ba aviaun Trans Nusa iha Aeroportu Internasional Nicolau Lobato Komoro, Dili.

Embaixadór ne'e hatete, tanba ligasaun ba kazu droga ne'ebé luan tenke iha asaun lalais no iha akurasia husi autoridade sira.

“(Kazu kazal Timor-oan) Oras ne'e sei iha prosesu nia laran tanba envolvimentu ka ligasaun ne'e luan tebes, tanba ne'e tempu ida lalais ne'e importante, akurásia. Se bele minutu de'it, karik ita kaer ema ida iha tuku ida, iha tuku ida liu minutu 15 ne'e ita hatene ona see mak haruka, ne'e importante, tanba informasaun mosu husi fatin oioin autór prinsipal rona halai lakon hotu tiha ona," dehan Sitorus.

"Bainhira hetan kapturasaun ne'e ha'u fó hanoin ona koko lalais uitoan,labele hein to'o aban loron matan sa'e. Agradese tanba bele atinze (kaer), agora nia ligasaun ba ne'ebé-ne'ebé de'it ne'e responsabilidade polisia ninian inklui matenek-nain sira.”

Embaixador ne'e hatete mós katak, nia parte lakohi atu Timor Leste sai fatin tranzisaun droga maske ema deskonfia TL nu'udar fatin tranzisaun droga.

"Maibé ita hakarak serbisu hamutuk entre governu Indonezia, polísia, inklui Badan Narkotika Nasional (BNN) ne'ebé kontinua fó apoiu, tanba ami hetan informasaun katak problema ne'e husi parte datoluk (pihak ketiga) mai Timor Leste ho objetivu mak ba liu Indonezia.”

Embaixadór ne'e hatutan, nia parte mós lakohi atu futuru jerasaun Timor Leste no Indonezia hetan estraga husi droga.

"Tanba ida ne'e hahalok ne'ebé halakon ema inklui aspeitu sira seluk. Tanba ne'e espera katak sei serbisu hamutuk di'ak liu tán entre Polísia Repúblika Indonezia (POLRI) ho Polísia Nasional Timor Leste, liu-liu iha fronteira," nia espera.