Prokuradór Jeral Republika José da Costa Ximenes informa, PJR delega hela reprezentante prokuradór no autoridade polisial nian hodi ba konfirma ho autoridade Indonezia relasiona ho kazu kazal Timor-oan ne'ebé atu tama ba prosesu inkeritu.
"Autoridade Indonezia halo ona Surat Perintah Dimulainya Penyelidikan (SPDP), ita-nia karik hanesan orden inisiasaun inkéritu hahú ona. Se orden inisiasaun inkéritu ne'e hahú ona, hahú ne'e oinsa, bele par ne'e bainhira iha situasaun rua. Ida nia (Kazal) sai surat perintah penghentian penyelidikan (SPPP) karik laiha provas, karik ita-nia laiha provas tenke arkiva", informa PJR hafoin enkontru mensal ho Prezidente Republika Francisco Guterres Lu Olo iha palásiu prezidensial Bairro-pite, Segunda (24/06/2019).
Daudauk ne'e, prokuradór dehan, nia parte koko kontaktu ho autoridade Indonezia hodi haree kazu kazal Timor-oan ne'e.
"Agora daudaun prokuradór jeral halo kontaktu ho autoridade sentral Indonezia ninian ne'ebé iha ministériu justisa ninia okos par atu haree took kestaun sidadaun Timor ninian", haktuir PJR.
PJR mós rekoñese katak akordu extradisaun ne'ebé laiha afeita mós ba esforu estadu Timor Leste hodi salva nia ema sira.
"Infelizmente to'o ohin loron estadu Timor Leste no nasaun viziñu sira seidauk iha kooperasaun bilateral no multilateral, espesifikamente uluk kazal ida sai husi ne'e ba Australia, depois pedidu mandadu kapturasaun, entaun ita haruka karta pedidu ba Australia, Australia la haruka maibé husik sira ba liu Portugal, tanba matéria presaun laiha," nia esplika.
Ba kestaun ne'e PJR dehan, tinan tolu tuituir malu nia parte hato'o ba parlamentu nasional kona-ba kooperasaun bilateral no multilateral nian, maibé to'o agora seidauk iha rezultadu.
"Prokuradó Jeral nia informasaun anual, ami hato'o tiha ona ida ne'e dala tolu tuituir malu, hanesan 2015, 2016, 2017 no agora tan, ami tenke propoin tan. Tanba matéria ne'e estadu ho estadu, governu ho governu."
PJR akresenta, kooperasaun kona-ba situasaun sira hanesan ne'e ho CPLP iha, maibé iha Azia laiha.
"Iha nivel CPLP nian iha, pur enkuantu ho Indonezia ne'e ita laiha, laiha akordu extradisaun, laiha akordu penal, laiha akordu kona-ba tranferensia kondenadu. Entaun ida ne'e dezafiu ida ne'ebé governu tenke hanoin", dehan nia.