Tempotimor (Dili)-Ministru Justisa (MJ), Manuel Cárceres da Costa, aprezenta ona lista prizioneiru hamutuk na’in-58 ba Prezidente Repúblika (PR), Francisco Guterres "Lú Olo", hodi fó ona indulta iha komemorasaun loron restaurasaun independensia 20 Maiu ba dala-19, kinta (20/05/2021). 

"Pedidu indultu peizioneiru sira nian ba sua exelénsia señor prezidente da repúblika ba 20 de maiu ne'e, prosesu hatama ona iha prezidénsia da repúblika ne'e iha 58 pedidu. Ita husu ba ema na'in-58 para husu señor prezidente atu fó ka la fó, kompeténsia ne'e señor prezidente da repúblika nian. Ida ne'e 20 de maiu, 2021 ne'e 58 pedidu", dehan ministru justisa, iha prizaun Bekora, sexta (14/05).

Maske prosesu fó indultu la'ós polítika ministériu nian, maibé ne'e lei mak obriga. Haree ba kada tinan iha loron istóriku sira hanesan 20 Maiu no 28 Novembru, governu liuhusi Ministériu Justisa hato'o pedisu indultu ba PR hodi liberta ona sira.

Diretór Guarda Prizionál Timor-Leste (GPTL) iha Prizaun Bekora, Joăo Domingos informa, pedidu indultu ne'ebé aprezenta, na'in-44 husi prizaun Bekora, no na'in-14 husi Prizaun Gleno ho Kovalima ne’ebé balu tanba proponente hato’o husi sira-nia advogadu no balu husi diretór prizionál rasik, tuir rekezitu pena ne'ebé prizioneiru sira iha.

"Iha proponente ne'e mai husi sira-nia advogadu rasik, sira dadur rasik, mai mós husi diretór, ne'e prienxe rekezitu katak, pena 8 anos mai kraik, um-terço, ne'e maioria ami aprezenta ida ne'e”, afirma nia.

Prizioneiru 58 ne'ebé pedidu indultu hatoo ona ba PR Lú Olo, maioria sira tinan ualu (8) mai kraik, maibé sira ne'ebé prienxe ona rekezitu.

Tuir dadus, dadaun ne'e, totál prizioneiru sira iha prizaun Bekora hamutuk 541, kompostu husi mane 537 no feto iha na’in-4.

Aliende ne’e iha prizioneiru ho idade 60, ina lista temporáriu besik ba 50. (*)