“Juiz sira haree katak adekuadu duni ba situasaun atual, tanba medida-de-koasaun ida ne'e mós bele aplika ba arguidu atu nune'e, situasaun agora ne'e, públiku hothotu intende katak PNTL sai hanesan problema, e nune'e mos arguidu nia vida, família, ho kondisaun sira ne'e hotu, tetu ba mai katak iha prizaun preventiva mak vale pena ba arguidu”, hatete Advogadu Cançio Freitas nu'udár defeza husi Arguidu MJ nian, hafoin rona desizaun husi Juiz sira iha TDD, tersa (08/06).
Parte defeza rasik sei la halo tan reskursu, tanba iha prosesu balu ne'ebé mak defeza presiza halo relasiona ho grupu balun ne’ebé destroi uma no sasán husi klénte.
“Ida, kona-ba inséndiu ne'ebé mak prátika husi grupu balu, elementu balu, hodi halo kauza ba arguidu ninia uma, rezidénsia, sasán sira ne'ebé mak rahun, ida ne'e mak defeza sei halo. Kona-ba desizaun ida ohin despaixu ne'e defeza sei la halo rekursu”, deklara nia.
Desizaun sira husi TDD ba kazu ne'e, juiz sira inputa krime rua ba arguidu MJ, mak hanesan kríme omesídiu agravadu ho tentada.
Durante primeiru interrogatóriu ne’e, dirije husi Juiz turnu, Afonso Carmona, Ministériu Públiku (MP) reprezenta husi Prokuradór Jacinto Babo, no arguidu hetan asisténsia legál husi advogadu Cançio Freitas.
Entretantu, insidente iha Suku Lahane Osidental, komete husi membru PNTL ho inisiál MJ, iha sábadu (05/06), maizumenus tuku 2:00 otl, hodi rezulta vitima na'in-rua hanesan Filomino de Deus (aman) ho Camilio de Deus (oan) mate fatin, no vitima Januário Pereira hetan kanek todan. (*)