"Husi parte defeza haree ministériu públiku viola ita-nia kódigu prosesu penal. Ne'e Ministériu públiku halo violasaun ida ne'ebé gráve, gráve, gráve tebtebes", dehan Advogadu husi eis Padre RD, Pedro Aparíçio iha Tribunál Rekursu (TR), Kaikoli, kinta (10/06).

Tuir loloos visum ne'e MP bele halo, bainhira ema ne'ebé mai konfesa katak, eis Padre RD halo violasaun seksual hasoru sira, atu fortifika sira-nia deklarasaun dehan, tebes duni akontese.

"Tanba ne'e mak bele halo visum. Maibe, sé ema, lezada mai dehan padre la halo, entaun ministériu públiku labele obriga tenke halo visum, ne'e labele. Saida mak, sé nia na'in rasik deklara dehan ema la halo buat ida ba nia, tanba saida mak tenke ba halo visum para hatama sasán saida, business ida ne’e ba iha ema nia lulik sira ne'e. Nee la presiza”, afirma nia.

Tanba ne'e mak nia haree katak, ministériu públiku halo violasaun ba kódigu prosesu penal, no sei halo keixa hasoru MP.

"Ami hanoin hela atu keixa ba ministériu públiku, liliu sira kaer prosesu ne'e, tanba sira-nia atuasaun ne'e la tuir kódigu prosesu penal ne'ebé mak iha”, dehan nia.

Tanba ne’e fó ezemplu, bainhira ema ida halo agresaun fizika hasoru sidadaun ruma, no sidadaun ne'e hatete ba prokuradór dehan ema baku nia, depois mak bele ba halo visum atu justifika katak ema ne'e halo duni agresaun hasoru nia.

"Maibé sé ha'u hatete dehan ema la baku ha'u, ema ida nunka halo agresaun fizika hasoru ha'u, mak ministériu públiku labele obriga ha'u tenke ba halo visum, tanba nia laiha nesesidade iha ne'ebá. Tanba ida ne'e mak ami haree katak, ba kazu Amu nian iha Oekussi ne'e, hetan violasaun barak ba kódigu prosesu penal ne'ebé mak ministériu públiku sira komete", haktenik nia.

Ho ida ne’e, konsidera visum sira ne'ebé durante halo, interese MP nian, tanba halo inkéritu hodi sai hanesan razaun ida ba ministériu públiku atu defende ninia akuzasaun iha tribubál, entaun tenke iha visum.

"Sé enkuandu, visum laiha, parte defeza mós mai hatete dehan, sé nia mai ko’alia, mais nia laiha visum, prova dokumental ida, ou ema péritu ida, la deklara ida katak, labele justifika ninia liafuan ne'ebé ema halo violénsia, violasaun hasoru nia", reforsa nia.

Entretantu, kazu Topu Honis ne'ebé ievolve husi eis padre RD ne'e, tanba deskonfia halo violasaun seksual hasoru labarik hamutuk na'in-30 durante hela iha uma-mahon ba kbi'it laek (Topu Honis), no ikus mai PRADET halo visum obrigatóriu iha Rejiaun Administrativa Espesial Oekussi Ambeno (RAEOA).

Hafoin julgamentu liuhusi vídeo konferénsia ne'e, Tribunal Rekursu (TR) muda prosesu julgamentu ba kazu eis Padre RD nian, iha loron 05 fulan-jullu tinan 2021, iha Tribunal Distrital Oekussi-Ambeno. 

Prosesu julgamentu ne'e, prezide husi Juiz Koletivu, Evagelion Belo, Yudi Pamunkdas, Carlos Hugo Pui, Ministériu Públiku, reprezenta Matias Boavida, no akompaña husi Advigadu Privádu, Pedro Aparíçio ho Migule Ferreira Faria. (*)