“Iha prosesu inspesaun ne'e, komisaun rekomenda ba Ministru Transporte no Telekomunikasaun atu temporariamente suspende operasaun tanba iha prosesu aprovizionamentu liga Ró Tranship II, hamosu dúvida no fatál tebes ne'ebé bele prejudika funsionáriu públiku MTK sira bainhira governu kontinua deside halo operasaun ba ró ne'e”, hatete Adjuntu Komisáriu KAK, Luis de Oliveira Sampaio, iha pájina Comissăo Anti Corrupçăo (CAC) TimorLeste, ne'ebé www.tempotimor.com asesu, kinta (10/06).
Tanba iha loron kinta (03/06) semana kotuk, KAK hamutuk ho Diresaun Nasional Transporte Marítima (DNTM) halo ona inspesaun no iha loron 10 fulan-juñu fó nia konkluzaun.
“KAK estuda hela, no kruza informasaun sira ne'e, tanba prosesu sira la'o dadauk ne'e, buat hotu sira halo tiha ona (lori tiha ró ne'e mai Timor, halo tiha kontratu ho ró ne'e) depois mak foin halo prosesa selebra kontratu. Kontratu halo tiha ona mak foin orienta halo prosesu aprovizionamentu ne'e”, hatete Sampaio.
Tuir dadus ne'ebé KAK iha, hatudu rezultadu inspesaun husi MTK nian, revela totalmente kontráriu ho rezultadu inpesaun KAK nian, tanba MTK fó buat ne'ebé di'ak de'it, maibé KAK ho mídia sira mós akompaña direta hela.
“Entaun, sira (MTK) koko ita! Mais, ita ninian temuan (inspesaun) ne'e kontráriu. Liliu buat ida substánsia liu mak iha prosesu aprovizionamentu ne'e”, esplika nia.
Aleinde ne'e, informasaun adisionál ne'ebé ekipa inspesaun prevensaun KAK nian hetan iha terenu, revela Ró Tranship II Gresik ninian produsaun tinan 2007 no Ró Succes ne'ebé hala'o ona operasaun iha Timor durante tinan hirak nia naran, fabrikadu iha tinan 2017.
“Iha ró ne'e rasik, oli suli hela iha ne'ebé perigu tebes ba ró no pasajeiru sira-nia salvasaun vida. Lampu sira mós kesi ho tali rafia no AC ró nian aat hodi uza fali AC ne'ebé atu instala de'it ba uma nian”, relata nia.
Entretantu, Ró Tranship II Gresik nee, governu liuhusi Ministériu Transporte no Komunikasaun (MTK) aluga husi Indonézia atu troka Ró Berlin Nakroma no Succes ne'ebé avaria (aat) hela. (*)