Diretór AJAR, José Luis Oliveira hatete, relasiona ho Prezidente Republika Indonézia kondekora Eurico Guterres ida ne’e lamenta tebes, tanba Eurico nia kualidade ka nia prestasaun lahanesan ho eis Prezidente Indonézia sira.
“Ita lamenta desizaun Jokowi, ne’e lahatudu estadu Indonézia nia prosesu atu debate kriminozu sira, maibé desizaun kondekora ne’e hanesan atu haburas impunidade”, dehan José Luis Oliveira iha edifísiu HAK, Farol, sesta (13/08).
Tanba Eurico Guterres simu kondekorasaun hanesan ho eis Prezidente Indonézia Gusdur, Habibie, no seluk tan.
"Tanba ne'e, sosiedade Sivíl Timor-Leste ho sosiedade Sivíl Indonézia hasai komunikadu hamutuk hodi kondena desizaun ne'e”, afirma nia.
Dadauk vítima sira ne’ebé sofre iha momentu tinan 1999, seidauk hetan justisa tanba prosesu rekonsialisaun.
Iha evidénsia hatudu katak nia (Eurico) mak komandu milisia sira hodi oho ema kuaze 1.200 iha loron 17 Abril 1999, sira halo serimónia boot iha Palásiu Governu hodi haruka milisia sira halo persegisaun, ataka refujiadu sira iha Manuel Carrascalão nia uma.
Iha momentu ne'eba lafunu ho sira, tanba FALINTIL iha hela akontamentu, nomós povu sivíl reklama pasivamente direitu ba ukun-an. Maibé Eurico mai halo krime, no konsege halao julgamentu iha Tribunál Jakarta no hetan kondenasaun tinan 10, ikus mai nia hetan libertasaun tanba hetan sasin.
Sosiedade Sivíl, respeita tebes desizaun kondekorasaun ne'ebé prezidente Jokowi halo, tanba ne'e direitu prerogativu PR Indonézia nian, maibé kondekora ema milisia, ida ne’e hatun kredibilidade kondekorasaun, tanba hatuur fali eis Prezidente Indonézia hanesan Abdurrahman Wahid (Gusdur) ho B. J. Habibie ho Eurico, ida ne’e lamentavel tebes.
Husu atu PR Indonézia retira fali desizaun ne’e, tanba haree ba estadu Indonézia kondekora ema krimonozu, ida ne’e mak dehan impunidade buras fali iha Indonézia.
Diretór Yayasan HAK, Xisto dos Santos hatete, iha tinan 20 resin liuba 1999, komandante milisia aitara Eurico Guterres ne’ebé mak indetiku ho icon ida ne’ebé mak komete violasaun direitu umanu, molok TL referindu.
“Eurico Guterres identiku ho krimininozu, maibé horisehik kinta-feira Prezidente Indonézia Joko Widodo kondekora Eurico Guterres, kondekorasaun ne’ehalo ita hakfodak no taridu, liliu ba vítima sira ne’ebé iha pasadu”, dehan Xisto.
Enkuantu, komunikadu imprensa organiza kompostu husi organizasaun ELSAM, AJAR, IMPARSIAL, IKOHI, KONTRAS, SAKBER 65, SKP-HAM, KONTRAS ACEH, SPKP HAM ACEH, KONTRAS SURABAYA, PAMFLET GENERASI, ACBIT, HAK, JSMP, FOKUPERS, NVA, Luta Hamutuk, CNC, no Asosiasaun Vítima 74-99. (*)