"Be agora realidade kaer dadauk ona ne'e, ne'e ami (CNRT) naran ko'alia arbiru de'it ga?…", deklara deputadu Domingos de Carvalho iha PN, segunda (23/08).
Tanba realidade, Komisaun Anti Korrupsaun (KAK) ezekuta mandadu husi Tribunál buska ba Diretór balun nomós hapara kontratu hodi haruka Ró tranship II fila ba nasaun Indonézia.
Bainhira deputadu KHUNTO la simu deklarasaun CNRT, prontu ba kaer mak deputadu CNRT, atu lori ba Ministèriu Públiku (MP), hodi bele hatene sala ga los.
Antes ne'e, Xefe Bankada Kmanek Haburas Unidade Nasionál Timor Oan (KHUNTO), Olinda Guterres, hamaus hela povu atu labele rona deklarasaun husi deputadu Bankada CNRT, tanba kazu Ró Tranship II Gresik dadaun ne’e Komisaun Anti Korrupsaun (KAK) halo ona investigasaun.
“Foin lalais, ha’u rasik ho Vise Prezidente Parlamentu Nasionál mak foti iha Parlamentu, katak atu halakon polemika ida ne'e, di'ak liu KAK tun ona, karik iha evidénsia ruma, KAK entrega ba Ministériu Públiku hodi prosesa ba tribunál. Karik iha evidénsia ruma, maibé labele rona CNRT”, hatete Olinda ba www.tempotimor.com liuhusi telefone, kinta (19/8).
Tanba, buat ne'ebé mosu, dala-ruma los mós bankada CNRT dehan sala, tanba CNRT lakon poder ona, ne'ebé sira ko’alia avontdade.
Ba kazu Ró Tranship II Gresik, karik Komisaun Anti Korrupasaun identifika evidénsia konkretu bele aprezenta ba Ministériu Públiku atubele submete ba tribunál. (*)
